Kazan federal uniwersitetiniň Ýelabuž institutynyň türkmenistanly talyby Emirhan Esenow Russiýanyň at gazanan tälimçileri Mýagas Sahabutfinowyň we Ashat Şaýhutdinowyň hatyrasyna tatar göreşi boýunça geçirilen XVII Bütinrussiýa ýaryşynda bürünç medala mynasyp boldy. Bu barada Türkmenistanyň Kazan şäherindäki Baş konsullugynyň metbugat gullugy habar berýär.
Ýaryş 20-nji fewralda Tatarystan Respublikasynyň Týulaçi obasyndaky «Batyr» sport toplumynda geçirildi.
68 kilograma çenli agram derejesindäki tutluşyklara gatnaşan ildeşimiz güýçli garşydaşlarynyň birnäçesinden rüstem gelip, bürünç medalyň eýesi boldy.
Emirhan Esenow göreş boýunça halkara derejeli ýaryşlaryň ozal hem birnäçesinde üstünlikli çykyş etdi. Mundan ozal ol Türkmenistanyň ýaşyl Tugunyň astynda 2021-nji ýylyň 17 ― 19-njy dekabry aralygynda guşakly göreş boýunça Başgyrdystanyň Ufa şäherinde geçirilen dünýäniň kubogyna gatnaşyp, bürünç medalyň eýesi bolupdy.
