Girmek
Birleşen Göreş dünýäsi (UWW) 2022-nji ýyldaky ýaryşlaryň meýilnamasyna üýtgeşme girizilendigini yglan etdi. Meýilnamada 4-nji we 7-nji fewral aralygynda Italiýanyň Rim şäherinde geçirilmegi meýilleşdirilýän «Matteo Pellikone» reýting ýaryşlary başga wagta süýşürildi. Indi bu ýaryş 22 — 25-nji iýun aralygynda geçiriler we ýylyň üçünji reýting ýaryşlary hasaplanar.
Bu ýyldaky möwsümiň birinji reýting ýaryşlary bolsa fewral aýynyň 24-i we 25-i aralygynda Türkiýäniň Stambul şäherinde geçiriler. Ýylyň ikinji reýting ýaryşlaryny 2-nji iýundan 5-nji iýuna çenli Gazagystanyň Almaty şäherinde geçirmek meýilleşdirilýär. Reýtinge girýän ýaryşlaryň iň soňkusy bolsa 14 — 17-nji iýul aralygynda Tunisde geçiriler. Ýene-de bir bellemeli zat reýting utuklaryny hasaplamakda hem azajyk üýtgetmeler kabul edildi. Meselem, mundan soňra ähli ýaryşlardaky utuklar hasaba alynmaz. Diňe göreşçileriň ýylyň dowamyndaky iň gowy netije görkezen dört ýaryşlaryndaky utuklary hasaba alnar. Bu barada «Aşgabat» gazetinde neşir edilen makalada habar berilýär.