Şu gün Aşgabatdaky «Nusaý» stadionynda futbol boýunça Türkmenistanyň kubogy ugrundaky ýaryşyň «Aşgabat» bilen «Altyn asyryň» arasyndaky ýarym finalynyň jogap duşuşygy geçirildi. Duşuşykda «Aşgabadyň» 2:1 hasabynda ýeňiş gazanandygyna garamazdan, iki duşuşygyň netijesi boýunça ýeňiji «Altyn asyr» boldy. Şeýlelikde, taryhynda altynjy gezek finala çykan «aragatnaşykçylar» iki duşuşygyň netijesi boýunça paýtagtyň adybir toparyny 4:3 hasabynda ýeňdiler.
Bu gezekki duşuşykda hasaby ilki bilen «Altyn asyryň» merkezi ýarym goragçysy Serdar Geldiýew açdy. Ýöne Türkmenistanyň at gazanan tälimçisi Ýazguly Hojageldiýewiň şägirtleri bu üstünligi gorap bilmedi. «Aşgabat» Şatlyk Gurbanowyň geçiren pökgüsi bilen hasaby deňläp, Nazar Tuwalekowyň pökgüsi bilen öňe saýlandy. Duşuşyk «Aşgabadyň» 2:1 hasabyndaky üstünligi bilen tamamlandy. Ýöne bu ýeňiş paýtagtyň adybir toparyna taryhynda üçünji gezek finala çykmak üçin ýeterlik bolmady.
Ertir ýarym finalyň ýene bir jogap duşuşygy geçiriler. «Aşgabat» stadionynda boljak duşuşykda Türkmenistanyň çempionatynda ikinji orna geçen «Ahal» Kubogyň soňky eýesi we bu ýaryşyň rekordçysy (10 final, 7 Kubok) «Köpetdagy» kabul eder. Mundan bir aý ozal «Köpetdag» stadionynda geçirilen duşuşyk «Ahalyň» 2:0 hasabyndaky üstünligi bilen tamamlanypdy. Ertirki deňlik ýa-da ýeňiş (bir pökgi tapawudy bilen utulyş hem) «Ahaly» finala çykaryp biler. Gazanyljak üstünlik has beteri «Türkmennebitönümleri» baş müdirliginiň toparyny AFK-nyň kubogy ― 2020-niň saýlama tapgyryna gatnaşmaga ýakynlaşdyrar.
