Türkmenistanyň futbol ýygyndysynyň we Gyrgyz Respublikasynyň «Dordoýynyň» hüjümçisi Wahyt Orazsähedow gyrgyz çempionatynyň 2019-njy ýyldaky möwsüminde iň kän tapawutlanan futbolçy bolmagy başardy. Türkmenistanly hüjümçi 28 duşuşykda 20 gol geçirdi. Ol çempionatyň «Kara-Balta» bilen geçirilen jemleýji duşuşygynda hem üç gol geçirip, möwsümi ajaýyp oýun bilen tamamlady. «Dordoýyň» metbugat gullugynyň taýýarlan interwýusynda ildeşimiziň möwsüm baradaky pikirlerine gyzyklanma bildirilýär.
― Siziň Gyrgyzystanda doly bir möwsümi geçirmegiňiz we gazanylan çempionlyk bilen gutlaýarys. Siziň Premýer-liga berýän bahaňyz nähili. Toparyňyz, geçen möwsüm barada nämeleri aýdyp biljek?
― Gutlag üçin sag boluň! Biz Gyrgyzystanyň kubogynyň finalynda ýeňildik, ýöne Naýbaşy kubok bilen çempionlyga mynasyp bolduk. Meniň pikirimçe, ähli maksatlar amal edildi. Her iki-üç günden bir oýun oýnadyk. Ýöne ýadadyk diýip bilmerin.
Gyrgyzystanyň çempionaty ― gyzykly. Ilkinji möwsümim maňa ýarady. Her dürli duşuşyk boldy: käbirinde garaşylan netijäni bermedik, käbirinde uly hasap bilen ýeňdik. Gol geçirip bilmän, ahmyrly bolan gezeklerimiz hem kän. Şeýle pursatlar hut şu duşuşykda hem boldy. Ýöne men möwsümden juda razy.
― Çempionatda iň köp tapawutlanan futbolçy bolmak nähili duýgy?
― Örän ýakymly. Muny ähli topardaşlarymyň, tälimçilerimiziň zähmeti bilen başardyk. Şonuň maňa kömek edenleriň ählisine çäksiz hoşallyk bildirýärin. Olaryň bu günki duşuşykdaky kömegi has güýçlüdi.
― Möwsüm tamamlandy. Siz geljekde-de futboly «Dordoýda» dowam etmegi meýilleşdirýärsiňizmi?
― Hawa, möwsüm tamamlandy. Ýöne öňde Türkmenistanyň futbol ýygyndysynyň hataryndaky oýunlarym bar. Galanyna soň serederis. Aslynda, şertnamam möwsümiň ahyryna çenlidi.
