16-njy martda Türkmenistanyň Ministrler Kabinetiniň Başlygynyň orunbasary, daşary işler ministri R.Meredow Katar Döwletiniň Premýer-ministri, daşary işler ministri Şeýh Mohammed bin Abdulrahman Al Tani bilen duşuşdy. Bu barada Türkmenistanyň daşary syýasat edarasy habar berdi.

Duşuşygyň başynda taraplar syýasy diplomatik, söwda-ykdysady hem-de medeni-ynsanperwer ugurlarda ikitaraplaýyn gatnaşyklary giňeltmek boýunça meseleleri ara alyp maslahatlaşdylar.

Ministrler iki döwletiň Baştutanlarynyň duşuşyklarynyň netijeleri türkmen-katar gatnaşyklaryna uly itergi berýändigini bellediler.

Şeýle-de söhbetdeşligiň barşynda taraplar türkmen-katar gatnaşyklarynda energetika, maýa goýum we ulag ugurlarynyň geljeginuň uludygyna ünsi çekdiler.

Mundan başga-da, sebit howpsuzlygy we ösüşiň ileri tutulýan meseleleri, şeýle hem Owganystandaky durmuş-ykdysady ýagdaýlar barada düýpli pikir alşyldy. Hususan-da, Türkmenistan — Owganystan — Pakistan — Hindistan (TOPH) transmilli gaz geçirijisiniň taslamasynyň durmuşa geçirilmeginde möhüm tapgyr bolan Owganystanyň çägindäki Serhetabat-Hyrat böleginde gurluşyk işleriniň gidişi barada aýdyldy. Katar tarapy bu ugurda alnyp barylýan hyzmatdaşlyga ýokary baha berdi.

Şeýle hem taraplar halkara guramalaryň çäklerinde alnyp barylýan hyzmatdaşlygyň konstruktiw häsiýetini bellediler.

Şunuň bilen baglylykda, 2025-nji ýylyň 12-nji dekabrynda Aşgabatda geçiriljek Halkara parahatçylyk we ynanyşmak ýylynyň wekilçilikli forumy barada aýdylyp, katar tarapy bu ýokary derejeli foruma gatnaşmaklyga çagyryldy.