Türkmenistanyň Prezidenti Koreýa Respublikasyndaky uçar heläkçiligi bilen baglanyşykly gynanç hatyny iberdi, Türkmenistanyň Prezidenti Baş arçanyň ýanynda we Söwda-senagat edarasynda guralan Täze ýyl dabaralaryna gatnaşdy, «Türkmenistan» awiakompaniýasy Aşgabat – Moskwa – Aşgabat ugry boýunça uçuşlary ýatyrdy we beýleki habarlar
Türkmenistanda
2. Türkmenistanyň Prezidenti Serdar Berdimuhamedow Aşgabatdaky «Älem» medeni-dynç alyş merkeziniň öňündäki meýdançada, ýurduň Baş arçasynyň ýanynda guralan dabaralara gatnaşdy. Merkeziň öňündäki meýdançada ýaşajyk türkmenistanlylaryň gatnaşmagynda ajaýyp baýramçylyk dabarasy ýaýbaňlandyryldy. Beýikligi 44 metre deň bolan Baş arçanyň töwereginde ertekiler dünýäsi emele getirilipdir. Baýramçylyga Türkmenistanyň dürli künjeklerinden çagalar çagyryldy, şolaryň hatarynda göreldeli okuwçylar, ders olimpiadalarynyň, sport, döredijilik bäsleşikleriniň ýeňijileri bar. Joşgunly aýdym-sazlaryň astynda Prezident çagalar bilen bilelikde Täze ýyl arçasynyň ýanyna barýar. Bu ýerde baýramçylygyň baş gahrymanlary Aýazbaba bilen Garpamyk hem-de ýylyň müçeleriniň keşplerini janlandyrýan körpeler ýaş nesilleriň adyndan Serdar Berdimuhamedowy gutladylar.
3. Türkmenistanyň Prezidenti Söwda-senagat edarasynyň binasynda Täze ýyl mynasybetli guralan baýramçylyk dabarasyna gatnaşdy. Bu ýerde çagalar döredijilik toparlarynyň, estrada aýdymçylarynyň, teatr we sirk artistleriniň çykyşlary guraldy. Binanyň baýramçylyk öwüşgininde bezelen uly zalyna Aýazbaba we Garpamyk, 2025-nji ýylyň nyşany bolan ýylan, baýramçylyk lybasly köp sanly ýaşajyk aşgabatlylar, paýtagtymyzyň myhmanlary ýygnandylar. Prezident Serdar Berdimuhamedow, şeýle hem bu ýere öz çagalarydyr agtyklary bilen gelen Hökümet agzalary we diplomatlar bu ýerde guralan çykyşlara tomaşa etdiler.
4. «Türkmenistan» awiakompaniýasy Aşgabat — Moskwa — Aşgabat ugry boýunça ýolagçy howa gatnawlarynyň 2024-nji ýylyň 30-njy dekabryndan 2025-nji ýylyň 31-nji ýanwaryna çenli ýatyrylýandygyny habar berdi. Awiakompaniýa 30-njy we 31-nji dekabrda Moskwadan Aşgabada Stambulyň üsti bilen gaýdyp gelip uçuşlaryny guraýar.
5. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň RF-niň Federal Ýygnagynyň Federasiýa Geňeşiniň Başlygy Walentina Matwiýenko bilen telefon arkaly söhbetdeşligiň dowamynda 2025-nji ýylyň maý aýynda «Awaza» milli syýahatçylyk zolagynda Merkezi Aziýa döwletleriniň we Russiýanyň zenanlarynyň ikinji dialogyny geçirmegi teklip etdi. Telefon arkaly söhbetdeşligiň barşynda söhbetdeşler birek-birege ýetip gelýän Täze ýyl mynasybetli mähirli gutlaglaryny we iň gowy arzuwlaryny beýan etdiler hem-de Türkmenistan bilen Russiýa Federasiýasynyň arasyndaky strategiki hyzmatdaşlygy berkitmäge we giňeltmäge ygrarlydyklaryny tassykladylar.
6. Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparynyň dowamynda bu ýerde gurluşyk işleriniň barşy bilen tanyşdy hem-de «akylly» şäheriň gurluşygy boýunça döwlet komitetiniň başlygy D.Orazowyň we şäheriň häkimi G.Mämmedowanyň gatnaşmagynda iş maslahatyny geçirdi. Iş maslahatynda gurluşygyň depgini, halkara hyzmatdaşlygy we täze şäheriň lukmançylyk klasteriniň önümleriniň hili ara alnyp maslahatlaşyldy. Gurbanguly Berdimuhamedow täze Arkadag şäheriniň ilatynyň bagtyýar durmuşyny üpjün etmegiň we häzirki zamanyň talaplaryna laýyk gelýän amatly şertleri döretmegiň möhümdigini aýtdy.
7. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň halkyny ýetip gelýän 2025-nji ýyl bilen gutlady. Taryhyň ýene-de bir ýylynyň tamamlanyp barýandygyny belläp, Gurbanguly Berdimuhamedow 2024-nji ýylyň «Pähim-paýhas ummany Magtymguly Pyragy» ýyly diýlip atlandyrylandygyny, munuň türkmen halkynyň akyldar şahyryna goýýan uly hormatyndan nyşandygyny nygtady. Pursatdan peýdalanyp, Gurbanguly Berdimuhamedow hemmeleri ýetip gelen Täze ýyl baýramy bilen tüýs ýürekden gutlady hem-de öňde goýlan wezipeleri ýerine ýetirmekde mundan beýläk-de zähmet üstünliklerini arzuw etdi.
Dünýäde
9. Amerikanyň Birleşen Ştatlarynyň ozalky Prezidenti Jimmi Karter 100 ýaşynda aradan çykdy. Oglunyň aýtmagyna görä, ol 29-njy dekabrda Jorjiýa ştatynyň Pleýns şäherindäki öýünde rahat ýagdaýda dünýeden ötüpdir. 1977-nji ýyldan 1981-nji ýyla çenli ýurda ýolbaşçylyk eden Karter 2019-njy ýylyň mart aýynda ABŞ-nyň taryhynda iň köp ýaşan Prezident hökmünde ykrar edildi. 2002-nji ýylda ol demokratiýany ösdürmekde, adam hukuklaryny goramakda goşan goşandy we parahatçylyk döredijilikli işleri üçin Parahatçylyk boýunça Nobel baýragy bilen sylaglandy.
Sport täzelikleri
9. «Ahal» futbol klubynyň ýarym goragçysy Elman Tagaýew 2024-nji ýylyň möwsüminiň jemleri boýunça Türkmenistanyň çempionatynyň iň ökde oýunçysy diýlip ykrar edildi. Baýrak gowşurmak dabarasy Aşgabatda geçirildi. 2024-nji ýylyň möwsüminde 35 ýaşly Tagaýew 15 gol geçirdi. «Ahal» 67 utuk toplady we Ýokary liganyň kümüş medalyny gazandy. «Arkadagyň» hüjümçisi Didar Durdyýew Türkmenistanyň çempionatynda iň köp gol geçiren oýunçy hökmünde sylaglandy. Durdyýewiň hasabynda 31 gol bar. 2024-nji ýylyň möwsüminiň iň ökde tälimçisi diýlip «Arkadag» toparyna ýolbaşçylyk edýän Wladimir Baýramow yglan edildi. Onuň ýolbaşçylygynda topar yzly-yzyna ikinji gezek ýurduň çempionatynyň ýeňijisi boldy we Türkmenistanyň Kubogyny eýelemegi başardy, şeýle hem ilkinji gezek ýurduň Naýbaşy kubogyny gazandy.
10. Ýaş türkmen türgenleri Daşkende 12 we 14 ýaşa çenli çagalaryň arasynda gylyçlaşmak boýunça Merkezi Aziýanyň çempionatynda bäş medala mynasyp boldular. Olar gylyçlaşmak boýunça ýaryşlarda iki altyn, bir kümüş we iki bürünç medal gazandylar.
