2024-nji ýylyň tamamlanan döwründe Lebap welaýaty boýunça maliýeleşdirmegiň ähli çeşmeleriniň hasabyna esasy serişdelere düýpli maýa goýumlarynyň 5 milliard manatdan gowragy gönükdirildi. Bu görkeziji geçen ýylyň degişli döwründäkiden 15,8 göterim artykdyr diýlip, «Türkmen gündogary» gazeti tarapyndan habar berildi.

Habarda bellenilişi ýaly, serişdeleriň 3 milliard 236,2 million manady önümçilik pudaklarynda, 1 milliard 771,7 million manady bolsa beýleki pudaklarda özleşdirildi. Bu görkeziji ykdysadyýetiň döwlete degişli böleginde 1 milliard 163,3 million manada ýetdi.

Şol serişdeleriň 41 göterimi önümçilik maksatly desgalara gönükdirildi. Şol bir wagtyň özünde medeni-durmuş maksatly desgalara gönükdirilen düýpli maýa goýumlary geçen ýylyň degişli döwrüne görä 9,4 göterim artyp, 685,8 million manada barabar boldy.

Hasabat döwründe welaýat boýunça döwletiň düýpli maýa goýumlarynyň hasabyna esasy serişdeleriň 1 890,2 million manatlygy işe girizilip, bu görkeziji 2023-nji ýylyň degişli döwrüne görä 183 göterim artdy. Esasy serişdeleriň 1 396,5 million manatlygy önümçilik maksatly, 493,7 million manatlygy bolsa medeni-durmuş maksatly pudaklarda işe girizildi.

Oba milli maksatnamasynyň çäginde şu ýylyň geçen döwründe döwletiň düýpli maýa goýumlarynyň 367,4 million manatlygy özleşdirildi. Şonuň netijesinde ýyllyk meýilnama 149,7 göterim berjaý edildi. Bu bolsa geçen ýylyň degişli döwri bilen deňeşdirilende 11 göterim artyş depgininiň gazanylandygyndan habar berýär.