Türkmenistanyň Bilim ministrliginiň we Zähmet we ilaty durmuş taýdan goramak ministrliginiň wekillerinden ybarat bolan wekiliýeti 5-7-nji noýabr aralygynda Fransiýanyň Lion şäherinde geçirilýän «Resmi däl bilimi we özbaşdak öwrenmek arkaly alnan ukyp-başarnyklary ykrar etmek ulgamyny kämilleşdirmek» atly halkara okuw-seminaryna gatnaşýar.

Çäre Ýewropanyň bilim gaznasy (ETF) hem-de Fransiýanyň AFPA agentligi tarapyndan guraldy. Okuw-seminaryň esasy maksady – oňa gatnaşyjy ýurtlary Fransiýanyň VAE (Validation des Acquis de l'Expérience) – «Tejribäni ykrar etmek» ulgamy bilen tanyşdyrmak we olary milli ulgamlarynda bu ugurda täze özgertmeleri ornaşdyrmaga ruhlandyrmakdan ybarat boldy.

Çärä şeýle hem Ýewropanyň we Merkezi Aziýanyň, Balkan we Gündogar Ortaýer deňzi ýurtlarynyň wekilleri gatnaşýarlar. Okuw-seminaryna gatnaşmak dürli ýurtlaryň wekillerine resmi däl bilimi ykrar etmek boýunça tejribe alyşmaga mümkinçilik berdi.

Häzirki wagtda Türkmenistanda resmi däl bilimi ykrar etmek ulgamyny kämilleşdirmek boýunça degişli işler alnyp barylýar. Hususan-da, hünär derejelerini bahalandyrmak we ykrar etmek üçin ýol kartasy, milli hünär derejeler binýady işlenip düzüldi, şeýle hem degişli kanunçylyk namalaryna üýtgetmeler girizmek boýunça işler alnyp barylýar. Mundan başga-da, Türkmenistanyň Bilim ministrligi bilen Zähmet we ilaty durmuş taýdan goramak ministrliginiň arasyndaky hyzmatdaşlyk pugtalandyrylýar. Türkmenistanda bu okuw-seminaryna uly ähmiýet berilýär, sebäbi halkara derejesinde alnan bilim we tejribe alyşmak täze çemeleşmelere ýol açýar.

Okuw-seminaryň ahyrynda oňa gatnaşyjylara Fransiýanyň milli mirasy bilen tanyşmak mümkinçiligi döredildi — diýlip, Türkmenistanyň Bilim ministrliginiň metbugat habarynda bellenilýär.