Serdar Berdimuhamedow Ispaniýanyň Patyşasyna gynanç bildirdi, 13 – 15-nji noýabrda Türkmenistanda «Gorkut ata» atly halkara kinofestiwaly geçiriler, Aşgabatda Türkmenistan bilen «Visa» kompaniýasynyň hyzmatdaşlygynyň 30 ýyllygy mynasybetli işewürlik forumy geçiriler we beýleki habarlar
Türkmenistanda
1. Türkmenistanyň Prezidenti Serdar Berdimuhamedow Ispaniýanyň Patyşasy Filipp VI ýurtda bolup geçen güýçli ýagyşlar sebäpli emele gelen suw joşgunlarynyň köp sanly adam pidalaryna, şikes ýetmelere hem-de uly möçberli weýrançylyklara getirendigi zerarly gynanç hatyny iberdi. Serdar Berdimuhamedow şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini aýtdy, ejir çekenlere bolsa tiz wagtda sagalmaklary baradaky dileglerini beýan etdi.
2. 13 – 15-nji noýabr aralygynda «Gorkut ata» atly halkara kinofestiwaly geçiriler. Halkara kinofestiwalyň açylyş we ýapylyş dabaralary Türkmenistanyň Döwlet medeniýet merkeziniň Mukamlar köşgünde bolar. Festiwalyň çäklerinde “Aşgabat” myhmanhanasynda TÜRKSOÝ-a agza ýurtlaryň kinematografiýaçylarynyň duşuşygyny geçirmek meýilleşdirilýär. «Aşgabat» kinoteatrynda, «Türkmenistan» we «Watan» kinokonsert merkezlerinde bolsa kinofestiwala gatnaşýan ýurtlaryň kinofilmleri görkeziler.
3. Aşgabatda Türkmenistan bilen «Visa» kompaniýasynyň arasyndaky hyzmatdaşlygyň 30 ýyllygy mynasybetli halkara işewürlik forumyny geçirmek meýilleşdirilýär. 27-nji noýabrda geçiriljek forumyň gün tertibine «Visa» kompaniýasy bilen strategik hyzmatdaşlygy hem-de halkara töleg ulgamynyň täze tehnologiýalary, innowasiýalary ösdürmek baradaky meseleleri giriziler.
Dünýäde
5. Ermenistanyň Prezidenti Waagn Haçaturýan ýurduň diplomatik gullugynda işgärleri wezipä belledi. Arsen Awakýan Ermenistanyň Türkmenistandaky täze Adatdan daşary we Doly ygtyýarly ilçisi wezipesine bellenildi. Ozal Eýranda ilçi bolup işlän Awakýan Ermenistanyň Siriýadaky diplomatik wekilhanasynyň ýolbaşçylygyna bellenen Ruben Harazýanyň ornuny eýelär. Türkmenistandaky täze ilçi Arsen Awakýanyň baý diplomatik tejribesi bar. Awakýan rus, türk we iňlis dillerini bilýär.
6. 6-njy noýabrda Bişkekde Türki Döwletleriň Guramasynyň nobatdaky on birinji sammiti geçiriler, oňa guramanyň bäş agza döwletiniň Baştutanlary we synçy ýurtlaryň Liderleri gatnaşar. «Türki dünýäsini güýçlendirmek: Ykdysady integrasiýa, durnukly ösüş, sanly geljek we hemmeler üçin howpsuzlyk» sammitiň şygary bolar. Sammitiň netijeleri boýunça 2025-nji ýylda TDG-niň başlyklygy Gyrgyzystana geçer.
Sport täzelikleri
7. Türkmenistanyň Prezidenti Serdar Berdimuhamedow 2024-nji ýylda halkara ýaryşlarda ýeňiji bolan Türkmenistanyň ýygyndy toparlarynyň türgenlerine Gutlag iberdi. Döwlet Baştutany Gutlagynda Gahryman Arkadagyň başyny başlan beýik başlangyçlary esasynda ýurduň halkara sport abraýynyň belent derejelere ýetendigini, sporty we sagdyn durmuş ýörelgesini ösdürmäge döwlet syýasatynda ileri tutulýan ugurlar hökmünde aýratyn ähmiýet berilýändigini belledi.
8. 8 – 17-nji noýabrda Türkmenistanyň paýtagtynda 14 ýaşa çenli ýetginjek oglan-gyzlaryň arasynda Tennis boýunça «Ashgabat Open 2024» atly halkara ýaryş geçiriler. Ýaryşlara Türkiýäniň, Hindistanyň, Pakistanyň, Eýranyň, Iordaniýanyň, Beýik Britaniýanyň, Malaýziýanyň, Gonkongyň we Merkezi Aziýanyň, jemi 12 ýurduň 70 türgeniniň gatnaşmagyna garaşylýar. Ýaryş şgabat şäherindäki Olimpiýa şäherçesiniň Tennis toplumynda geçiriler.
9. Türkmenistanyň «Arkadag» futbol topary AFK-nyň Çagyryş ligasynyň toparçalaýyn tapgyrynyň ahyrky aýlawynda Kuweýtiň «Al-Arabi» toparyndan 2:3 hasabynda ýeňildi, ýöne ýeňilendigine garamazdan, «B» toparçadaky birinji ornuny saklady hem-de 2025-nji ýylyň ýazynda geçiriljek, ähmiýeti boýunça Aziýanyň üçünji klublaýyn ýaryşynyň çärýek finalyna çykdy. Türkmen kluby Hindistanyň «Ist Bengal» topary bilen duşuşar. Duşuşyklar 5-nji we 12-nji martda «öýde we myhmançylykda» görnüşinde geçiriler.
