Kazan şäherinde geçirilen XVI BRIKS sammitiniň çäklerinde Türkmenistanyň Prezidenti Serdar Berdimuhamedow bilen Birleşen Milletler Guramasynyň Baş sekretary Antoniu Guterrişiň duşuşygy boldy. Bu barada "Watan" habarlar gepleşiginde habar berildi.

Bellenilişi ýaly, Prezident Serdar Berdimuhamedow we Baş sekretar Antoniu Guterriş mähirli salamlaşyp, umumy maksatlary we häzirki döwrüň wezipelerini nazara almak bilen ýola goýlan netijeli hyzmatdaşlygyň häzirki ýagdaýyny, ony mundan beýläk-de ösdürmegiň mümkinçiliklerini ikiçäk duşuşykda ara alyp maslahatlaşmaga dörän mümkinçilige kanagatlanma bildirdiler.

Türkmenistanyň Prezidenti pursatdan peýdalanyp, Antoniu Guterrişi BMG-niň güni bilen tüýs ýürekden gutlady we şu duşuşygyň netijeleriniň däp bolan hyzmatdaşlygy ösdürmäge täze itergi berjekdigine ynam bildirdi.

BMG-niň Baş sekretary gutlaglar we hoşniýetli sözler üçin, şeýle hem şu ýylyň iýul aýynda Aşgabada amala aşyran saparynyň dowamynda bildirilen myhmansöýerlik üçin hoşallyk bildirip, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa iň gowy arzuwlaryny beýan etdi.

Duşuşygyň barşynda Türkmenistanyň başlangyjy boýunça BMG-niň Baş Assambleýasynyň 2025-nji ýyly "Halkara parahatçylyk we ynanyşmak ýyly" diýip yglan edendigi bellenildi. Söhbetdeşler ileri tutulýan ugurlarda özara gatnaşyklary giňeltmegiň mümkinçilikleri barada pikir alyşdylar.

Prezident Serdar Berdimuhamedow dünýä ösüşiniň ählumumy meselelerini çözmegiň möhümdigini belläp, türkmen tarapynyň özara hormat goýmak esasynda ýola goýlan netijeli dialogy hemmetaraplaýyn giňeltmäge we çuňlaşdyrmaga taýýardygyny ýene bir gezek tassyklady.

Baş sekretar Antoniu Guterriş häzirki döwrüň möhüm meselelerini çözmäge başlangyçly çykyş edýändigi we BMG-niň ýöriteleşdirilen edaralary bilen köpugurly hyzmatdaşlygy alyp barýandygy üçin hoşallyk bildirip, Türkmenistanyň ählumumy parahatçylygy, howpsuzlygy we durnukly ösüşi üpjün etmek işinde BMG-niň möhüm hyzmatdaşy bolandygyny we şeýle bolmagynda galýandygyny nygtady. Şeýle hem ol Türkmenistanyň halkara gatnaşyklarda parahatçylyk we ynanyşmak ýörelgelerini berkarar etmek boýunça başlangyçlaryna ýokary baha berdi we Prezident Serdar Berdimuhamedowyň XVI BRIKS sammitiniň degişli formatdaky mejlisinde beýan eden teklipleriniň möhümdigini belledi.