9-10-njy aprel günleri UEFA-nyň Çempionlar ligasynyň çärýek finalynyň deslapky oýunlary geçirildi. Olarda aşakdaky netijeler hasaba alyndy.
«PSŽ» – «Barselona» – 2:3
«Barselona» ÝÇL-iň çärýek finalynyň deslapky oýnunda «Pari Sen-Žermeni» 3:2 hasabynda ýeňlişe sezewar etdi. Oýun Pariž şäherinde geçirildi.
«Barselonanyň» düzüminde Rafinýa dubl etdi (37, 62) we Kristensen tapawutlandy (77). Ýer eýeleriniň gollaryna bolsa Usman Dembele (48) we Witinýa (51) awtorlyk etdiler.
«Atletiko Madrid» – «Borussiýa Dortmund» – 2:1
Günüň beýleki oýnunda Madridiň «Atletikosy» öz öýünde Dortmundyň «Borussiýasyny» 2:1 hasabynda ýeňdi. Ýer eýelerine ýeňiş getiren gollar Rodrigo de Paulyň (4) we Samuel Linonyň (32) adyna ýazyldy. Myhmanlaryň ýeke-täk jogap topy bolsa 81-nji minutda Sebastýan Aller tarapyndan derwezä gönükdirildi.
BU jübütleriň arasyndaky jogap oýunlary 16-njy aprelde geçiriler.
«Real» – «Mançester Siti» – 3:3
Bir gün ozal Angliýanyň «Mançester Sitisi» ispanlaryň «Realynyň» myhmany bolup, 3:3 hasabynda deň oýnady. «Mançester Sitiniň» gollary Bernardu Silwa (2), Fil Foden (66) we Ýoşko Gwardiol (71) tarapyndan derwezä gönükdirildi. «Realyň» düzüminde bolsa Rodrigo (14) we Federiko Walwerde (79) tapawutlandy. Ýer eýeleriniň ýene bir goly myhmanlaryň oýunçysy Ruben Diaşyň adyna awtogol hökmünde ýazyldy.
«Arsenal» – «Bawariýa» – 2:2
Şol günüň beýleki gapma-garşylygynda «Arsenal» öz öýünde «Bawariýa» bilen 2:2 hasabynda deň oýnady. Duşuşykda ýer eýelerinden Bukaýo Saka (12) we Leandro Trossard (76), myhmanlardan bolsa Serj Gnabri (18) we Garri Keýn (32, penalti) tapawutlandy. Bu jübütleriň arasyndaky jogap oýunlary 17-nji aprelde geçiriler.
ÝÇL-iň şu möwsümdäki finaly 1-nji iýunda Londondaky «Uembli» stadionynda geçiriler. Ýaryşyň häzirki çempiony geçen ýyl finalda «Interi» 1:0 hasabynda ýeňen «Mançester Siti» hasaplanýar.
