Türkmenistanyň futbol çempionatynyň 5-nji tapgyrynda paýtagtda «Köpetdagyň» myhmany bolan «Şagadam» ajaýyp ýeňiş gazandy. Türkmenbaşy şäherinden gelen topary «Köpetdagy» 4:1 hasabynda ýeňmegi başardy.
«Kenarlylar» 10-njy minutda Röwşen Baýlyýewiň geçiren goly bilen öňe saýlanan hem bolsalar, «Köpetdag» 3 minut soňra Şiri Annaýewiň tapawutlanmagynda hasaby deňledi. Ýöne duşuşykda şondan soň ýer eýeleriniň «sesi çykmady». Tersine, «Şagadam» ýene-de üç gol geçirdi. 29-njy minutda Mekan Aşyrow (11 m.j.u.), 45-nji minutda Arslan Ýollyýew, 54-nji minutda bolsa «Şagadamyň» şu möwsümdäki iň netijeli futbolçysy Hydyrgeldi Atdjanow tapawutlandy.
Bu ýeňşiň «Şagadam» üçin iň ýakymly tarapy toparyň ýaryş tertibinde ikinji basgançaga çykmagydyr. Munuň özi geçen möwsümi iň soňky basgançakda tamamlan topar üçin diýseň uly üstünlik. Başga bir tarapdan bolsa, garaşylmadyk toparyň «Ahal», «Altyn asyr» ýaly has güýçli garşydaşlardan hem öňe saýlanyp, ikinji orna çenli çykmagy Ýokary liganyň täze möwsüminde bäsdeşligiň has güýçli boljakdygyny görkezýär.
Dört duşuşykda ikinji gezek ýeňlen «Köpetdag» bolsa ýaryş tertibiniň sekizinji basgançagyna çenli çökdi.
6-njy tapgyrda «Şagadam» «Energetigi» kabul eder, «Köpetdag» bolsa ýaryşyň lideri «Arkadag» toparynyň myhmany bolar.
