Girmek
Halkara futbol federasiýasy (FIFA) milli ýygyndylaryň täzelenen reýtingini yglan etdi. Reýtingde Türkmenistanyň ýygyndysy ozalky 141-nji ýerinde galdy.
Türkmenistanyň ýygyndysy 2023-nji ýylyň ýanwaryndan bäri Mergen Orazowdan tälim alýar. Türkmenistanyň ýygyndysynyň FIFA reýtingindäki iň ýokary görkezijisi 2004-nji ýylyň aprel aýynda hasaba alnyp, şonda türkmen ýygyndysy sanawyň 86-njy basgançagyna çenli ýokarlapdy.
Ýeri gelende bellesek, häzirki wagtda Merkezi Aziýa ýurtlarynyň arasynda FIFA reýtingindäki iň gowy orun Eýranyň ýygyndysyna degişli. Eýran häzir sanawyň 20-nji ornuny eýeläp dur. Şeýle-de, täze reýtingde Özbegistan 66-njy, Täjigistan 99-njy, Gazagystan 100-nji, Gyrgyzystan 104-nji we Owganystan 158-nji basgançakdan orun aldy.
Ozal habar berşimiz ýaly, Türkmenistanyň milli ýygyndysy 14-nji martda Gazagystanyň milli ýygyndysy bilen ýoldaşlyk duşuşygyny geçirer. Duşuşyk BAE-däki okuw-türgenleşik ýygnanyşygynyň çäginde guralar.
Türkmenistanyň milli ýygyndysynyň öňdäki resmi oýunlary mart aýynyň üçünji ongünlüginde bolar. Has takygy, türkmen futbolçylary DÇ-2026-nyň saýlama tapgyrynyň çäginde 21-nji martda Tähranda, 26-njy martda bolsa Aşgabatda Eýran bilen güýç synanyşarlar.