Girmek
Türkmenistanyň Futbol federasiýasy Ýokary liganyň täze möwsümine 4-nji martda girişmegi meýilleşdirýär. Federasiýa bu barada Ýokary liga wekilçilik edýän klublara resmi hat bilen çykdy. Bu barada Janköýer habar berdi.
Hatda görkezilişi ýaly, Türkmenistanyň çempionatynyň ilkinji üç tapgyrynyň duşuşyklaryny 4-nji, 7-nji we 10-njy mart günlerinde geçirmek göz öňünde tutulýar. Şondan soňra bolsa ýurdumyzyň milli ýygyndysy Eýranyň ýygyndysy bilen Dünýä çempionaty 2026-nyň we Aziýanyň kubogy 2027-niň saýlama duşuşyklarynyň ikisini geçirer.
Federasiýanyň täze möwsüme baharyň ilkinji günlerinde badalga bermeginiň esasy sebäbi milli ýygyndynyň saýlama duşuşyklara taýýarlyk barmagyny üpjün etmekdir.
Ozal hem habar berşimiz ýaly, futbol boýunça Türkmenistanyň çempionatynyň 2024-nji ýyldaky möwsümi 4 aýlawdan ybarat bolar. Ýakyn günlerde ilkinji aýlawlaryň senenamasy paýlaşylar. Häzirki wagtda bolsa türkmen futbolynda gyşky transfer penjiresi dowam edýär. Ýokary liganyň wekilleri täze ýylyň ilkinji günlerinden türgenleşiklere girişdiler.