Girmek
Ýewropa Çempionlar ligasynyň 6-njy tapgyryndan orun oýunda «Mançester Ýunaýted» öz oýünde «Bawariýadan» 0:1 hasabynda asgyn geldi. Oýundaky ýeke-täk gol 70-nji minutda Kingsli Koman tarapyndan derwezä ýollandy.
Şeýlelikde, bu ýeňlişden soňra niderlandly Erik ten Hagdan tälim alýan «Mançester Ýunaýted» birnäçe antirekordlary täzeledi. Birinjiden, «Mançester Ýunaýted» ÝÇL-iň toparçalaýyn tapgyrynda öz derwezesine 15 gol geçirden ilkinji iňlis kluby boldy. Ikinjiden, dört utuk bilen «A» kwartetinde iň soňky orny eýelän «Mançester Ýunaýted» ÝÇL-iň toparçalaýyn tapgyryny iň az utuk bilen jemledi. Üçünjiden, «Mançester Ýunaýted» öz taryhynda ikinji gezek (mundan ozalkysy 2005/2006-njy ýylky möwsümde bolupdy) ÝÇL-i toparçadaky dördünji orun bilen terk etdi. Häzire çenli bu ýaryşda hiç bir iňlis kluby ýaryşyň toparçalaýyn tapgyrynda iki gezek iň soňky orny eýelemändi.
Ýeri gelende bellesek, düýnki oýunlardan soňra ÝÇL-iň 1/8 final tapgyryna ýollanma alan 14 topar belli boldy. Has takygy, şu görkezilen toparlar ýaryşy dowam etdirmäge hukuk gazandylar: «Napoli», «Kopengagen», PSW, «Mançester Siti», «Bawariýa», «Inter», «Real Sosýedad», «Real Madrid», «RB Leýpsig», «Atletiko Madrid», «Barselona», «Borussiýa Dortmund», «Lasio» we «Arsenal».