Eýranyň Maşat şäherinde «Star Expo 2023» ady bilen iýmit we syýahatçylyk ugruna bagyşlanan dördünji sergi öz işine başlady.
28-nji noýabrda şäheriň «Ýyldyz» söwda merkeziniň binasynda işe başlan bu sergä Türkmenistanyň Maşat şäherindäki Baş konsullygy öz sergi stendi bilen gatnaşdy. Bu barada Türkmenistanyň DIM-niň resmi saýtynda habar berildi.
Habarda bellenilişi ýaly, Türkmenistanyň sergi stendinde türkmen halkynyň gadymy taryhyny, baý medeni mirasyny, döredijilik däplerini şöhlelendirýän şekillendiriş, amaly-haşam sungatynyň eserleri, saz gurallary we milli lybaslary görkezildi.
Şeýle-de, sergä gatnaşyjylara türkmen halkynyň Milli Lideri Gurbanguly Berdimuhamedowyň kitaplary bilen tanyşmaga mümkinçilik döredildi diýlip, habarda bellenilýär.
