7-nji sentýabrda Duşanbe şäherinde «GDA agza ýurtlaryň syýahatçylyk pudagynda hyzmatdaşlygyň täze tapgyry» atly iki günlük halkara syýahatçylyk forumy açylýar. Foruma syýahatçylyk administrasiýalarynyň ýolbaşçylary, işewür toparlar we Garaşsyz Döwletleriň Arkalaşygynyň agza döwletleriniň syýahatçylyk pudagynda zähmet çekýän hünärmenler gatnaşýar.

Halkara derejeli çärä Türkmenistanyň Medeniýet ministrliginden A.Agamyradow we «Bagtyýar dostlar» syýahatçylyk kompaniýasynyň müdiri R.Sadykow wekilçilik eder.

Syýahatçylyk forumyna gatnaşyjylar bilelikdäki syýahatçylyk önümlerini döretmek, syýahatçylyk hyzmatlaryny sanlaşdyrmak we GDA ýurtlarynda syýahatçylyk toparlaryny ösdürmek boýunça üç ugurly tematiki sessiýanyň dowamynda tejribe alyşmaga we köptaraplaýyn hyzmatdaşlygyň ugurlaryny kesgitlemäge mümkinçilik alarlar.

Şeýle hem, çäräniň çäginde Täjigistanda we GDA ýurtlarynda lukmançylyk-ekologiýa we taryhy-medeni syýahatçylygyň mümkinçilikleri barada wizual maglumatlary berjek «Duşanbe-2023» sergisi geçiriler.

Syýahatçylyk forumynyň iş maksatnamasy dürli ýurtlardan syýahatçylyk operatorlarynyň arasynda duşuşyklary we gepleşikleri öz içine alýar.

Halkara syýahatçylyk forumy Täjigistan Respublikasynyň Hökümetiniň ýanyndaky Syýahatçylygy ösdürmek komiteti tarapyndan 27-nji sentýabrda bellenilýän Bütindünýä syýahatçylyk gününiň öňüsyrasynda Garaşsyz Döwletleriň Arkalaşygynyň (GDA) Ýerine ýetiriji komiteti bilen bilelikde geçirilýär.