Duşenbe güni Bakuwda türki ýurtlaryň ilkinji bilelikdäki media platformasy bolan «Turkic.World» («Türki dünýäsi») taslamasynyň ofisiniň açylyş dabarasy boldy. Platforma eýýäm «Kazinform» halkara habar gullugy, Özbegistanyň «UzA» milli habarlar gullugy, Gyrgyzystanyň «Kabar» milli habarlar gullugy we Türkmenistanyň Daşary işler ministrligi goşuldy diýip, «AZERTAC» habar berýär.

Guramaçylaryň bellemegine görä, häzirki wagtda platformada 10 žurnalist işleýär. Ýylyň ahyryna çenli ýene 50 işgäri işe kabul etmek hem-de platformanyň radio we telewideniýe ýaly ugurlaryny döretmek meýilleşdirilýär.

Platformanyň başlygy Rufiz Hafizogly geljekki meýilnamalar barada aýdyp, belli syýasy şahsyýetler, wezipeli adamlar, taryhçylar, ähli doganlyk respublikalaryň dürli gahrymanlary barada habarlaryň yzygiderli berlip duruljakdygyny mälim etdi.

Indi «Turkic.World» saýty öz işini 8 daşary ýurt dilinde alyp barýar. Taslama iki ýyl bäri hereket edip gelýär we internet arkaly ýaýlyma berilýär, Azerbaýjanyň, Gazagystanyň, Gyrgyzystanyň, Özbegistanyň, Türkmenistanyň we Türkiýäniň syýasaty, ykdysadyýeti, medeniýeti we jemgyýetçilik durmuşy barada, umuman, türki dünýäsi barada habarlar çap edilýär.

Taslama ilkinji gezek 2021-nji ýylda Stambuldaky Türki Hyzmatdaşlyk Guramasynyň media forumynda hödürlendi we 25-nji Halkara Işewürlik Forumynyň (IBF) resmi media hyzmatdaşy boldy. «Turkic.World» şeýle hem «Teknofest 2022» aerokosmik inženerçilik we tehnologiýa festiwalynyň resmi media hyzmatdaşy bolup çykyş etdi.