Russiýa Federasiýasynyň Kurgan sebiti Türkmenistandan 17 tonnadan gowrak goýun ýüňüni import etdi. Bu barada «Rosselhoznadzoryň» resmi web sahypasynda habar berildi.
Habar berlişi ýaly, 3-nji iýulda «Rosselhoznadzoryň» Çelýabinsk we Kurgan sebitleri boýunça edarasy Týumen gümrük gullugynyň işgärleri bilen Kurgan şäheriniň hemişelik gümrük gözegçilik zolagynda üsti 17,4 tonna goýun ýüňli ulagy gözden geçirdi.
Çig malyň Türkmenistan Respublikasynyň ykdysady we dolandyryş sebitlerinden getirilýändigi görkezilen weterinariýa sertifikaty we weterinariýa şahadatnamasy bolan ýüküň sebite awtoulag transporty arkaly getirilendigi aýdylýar. Şeýle hem çig malyň öndürilen ýeri bolan Türkmenistanda haýwanlar we guşlar, şol sanda adamlar üçin howply keselleriň hasaba alynmandygy bellenilýär.
Çig malyň resminamalarynda onuň degişli talaplara görä ýuwlup-arassalanandygy görkezilýär. Habarda ýüküň degişli hünärmenler tarapyndan geçirilen ýörite barlaglardan hem üstünlikli geçendigi aýdylýar.
