Aşgabatda «Arkaç» atly operanyň ilkinji görkezilişi boldy

Şu gün Aşgabat şäherinde badalga alan Medeniýet hepdeliginiň çäginde Türkmenistanyň Magtymguly adyndaky milli sazly drama teatrynda «Arkaç» atly operanyň ilkinji görkezilişi boldy.

Türkmenistanyň halk ýazyjysy Gowşutgeldi Daňatarowyň librettosy esasynda goýlan opera «Aýna» atly meşhur halk dessany edebi esasy bolup hyzmat etdi. Spektaklda XVIII asyrda Arkaç obasynda bolup geçen waka beýan edilýär.

Operada Kadyr Esenow Söhbediň, Dünýägözel Begaliýewa Aýnanyň, Begenç Gaýypow Aýnanyň kakasy Jumaguly baýyň, Tylla Saryýewa Aýnanyň ejesi Baýrygüliň, Guwanç Saparmyradow Alikber Çopanyň, Arzygül Gylyjowa Alikber Çopanyň aýaly Merwe bajynyň, Göwher Kakabaýewa Alikber çopanyň gyzy Ablagyň, Türkmenistanyň halk artisti Atajan Berdiýew Jullynyň, Gadam Akmyradow bolsa aýaly dünýeden ir öten Babyryň keşbinde çykyş edýär.

«Arkaç» operasynyň režissýory Türkmenistanyň sungatda at gazanan işgäri Aýnazar Batyrowdyr. Operanyň sazyny Türkmenistanyň halk artisti Hudaýnazar Amangeldiýew ýazypdyr. Operanyň suratkeşi Mekan Annamyradowyň ýolbaşçylygynda ýerine ýetirilen sahna bezegi operada beýan edilýän wakalaryň ýyllaryna alyp gidýär.

Operada beýan edilýän wakalar, ýaňlanýan sazlardyr ýerine ýetirilýän aýdymlar oňa tomaşa etmäge gelen tomaşaçylarda ýakymly täsir galdyrdy.