Ozal habar berşimiz ýaly, 11-nji maýda türkmenistanly ýaş hünärmenleriň we dürli hünärler boýunça bilim alýan talyplaryň arasynda innowasiýa ideýalary boýunça «Falling Walls Labs» halkara ylmy-barlag bäsleşigi geçirildi. Bäsleşige saýlanyp alnan taslamalaryň 12 sanysy gatnaşdy.
Türkmenistanyň taryhynda ilkinji gezek geçirilen «Falling Walls Labs» halkara ylmy-barlag bäsleşigi Türkmenistanyň Bilim ministrligi hem-de Germaniýanyň akademiki alyş-çalyş gullugy tarapyndan
Germaniýanyň Federal Respublikasynyň Türkmenistandaky ilçihanasynyň goldaw bermeginde guraldy.
Çäräniň dowamynda Germaniýanyň Türkmenistandaky Adatdan daşary we Doly ygtyýarly ilçisi Maýkl U.Birhoffyň çykyşy diňlenildi.
Bäsleşigiň eminler toparynhyň düzüminde Germaniýanyň Türkmenistandaky ilçihanasynyň wekili Dirk Ýakobi, «Commerzbankyň» Aşgabatdaky şahamçasynyň direktory Aleksandr Lir, ÝUNFPA-nyň Aşgabatdaky edarasynyň başlygy Aýna Seýitliýewa, Aşgabadyň halkara mekdebiniň direktory doktor Jodi Bernsaýd hem-de «General Electrik» kompaniýasynyň Aşgabatdaky şahamçasynyň direktory Marat Jernaýew taslamalara baha berdi.
Eminler toparynyň gelen netijesine laýyklykda, şalynyň «Bereket» atly täze sortuny döreden S.Seýdi adyndaky Türkmen döwlet mugallymçylyk institutynyň mugallymy Eziz Artykow birinji orna mynasyp boldy.
Şeýlelikde, ol ýeňiji hökmünde şu ýylyň noýabr aýynda Berline gitmäge mümkinçilik aldy. Bäsleşikde ikinji orna M.Garryýew adyndaky Türkmen döwlet lukmançylyk uniwersitetiniň talyby Selbi Aşyrberdiýewa, üçünji orna bolsa Türkmenistanyň Daşary işler ministrliginiň Halkara gatnaşyklary institutynyň talyby Arslankerim Kerimow mynasyp boldy.
Ýeri gelende bellesek, «Falling Walls Labs» — bu ylym, işewürlik, syýasat, sungat we jemgyýetçilik dünýäsiniň öňdebaryjylary üçin özboluşly halkara ylmy meýdançadyr.
