Girmek
FIFA-nyň prezidenti Janni Infantino Argentinanyň milli ýygyndysynyň oýunçylaryna Katarda geçirilen 2022-nji ýyldaky futbol boýunça dünýä çempionatynda ýeňiji bolandyklary mynasybetli futbol boýunça Dünýä Kubogyny gowşurdy.
Argentina milli ýygyndysyna baş baýrak gowşurylmazyndan ozal Fransiýanyň milli ýygyndysy kümüş medallary bilen sylaglandy.
Ondan öň Infantino ýaryşyň iň gowy oýunçylaryna aýratyn baýraklar gowşurdy. Iň gowy oýunçy hökmünde argentinaly Lionell Messi, iň gowy ýaş oýunçy hökmünde Argentinanyň milli ýygyndysynyň ýarymgoragçysy Enzo Geremias Fernandes, iň gowy derwezeçi hökmünde argentinaly Emiliano Martinez ykrar edildi. Fransiýaly Kliýan Mbappe sekiz gol bilen 2022-nji ýyldaky dünýä çempionatynda iň köp gol geçiren oýunçy boldy.
Argentina öz taryhynda üçünji gezek dünýä çempiony boldy. Mundan öň bu ýurduň ýygyndy topary 1978-nji we 1986-njy ýyllarda mundialyň çempiony bolupdy.
Ýeri gelende ýatlatsak, DÇ-2022-niň finalynda Argentinanyň Fransiýany oýundan soňky 11 metrlik urgularda ýeňlişe sezewar edendigini habar beripdik. Esasy we goşmaça wagty 3:3 hasabynda tamamlanan oýunda Argentina penaltiler boýunça garşydaşyny 4:2 hasabynda ýeňdi.