Şu gün Prezident Serdar Berdimuhamedow Russiýa Federasiýasynyň «Wozroždeniýa» taslama-gurluşyk kompaniýalar toparynyň ýolbaşçysy Igor Bukatony kabul etdi. Bu barada «Watan» habarlar gepleşiginde habar berildi.

Bellenilişi ýaly, işewür wagt tapyp kabul edendigi we özara gatnaşyklaryň geljekki ugurlaryny ara alyp maslahatlaşmaga döredilen mümkinçilik üçin tüýs ýürekden hoşallyk bildirip, türkmen döwletiniň Baştutanyny Türkmenistanyň Birleşen Milletler Guramasynyň Baş Assambleýasynyň Kararnamalary bilen iki gezek ykrar edilen hemişelik Bitaraplyk derejesiniň 27 ýyllyk baýramçylygy bilen gutlady.

Igor Bukato häzirki döwürde amala aşyrylýan we Garaşsyz, Bitarap Türkmenistanyň durmuş-ykdysady taýdan ösüşine kuwwatly itergi beren özgertmeleriň üstünlikli amala aşyrylýandygyny we ýurduň halkara giňişlikdäki abraýynyň belende galýandygyny aýratyn belläp, Türkmenistan bilen ýola goýlan hyzmatdaşlyga buýsanýandygyny we özüniň ýolbaşçylyk edýän kompaniýasynyň giň möçberli düzümleýin taslamalary ýerine ýetirmäge bolan ägirt uly gyzyklanmalaryny beýan etdi.

Prezident Serdar Berdimuhamedow gutlaglar we hoşniýetli sözler üçin minnetdarlyk bildirip, Türkmenistanyň innowasion işläp taýýarlamalary hem-de önümçilige täzeçil usullaryň ornaşdyrylmagyny esasy ugur edinýändigini belledi. Şeýle-de döwlet Baştutany «Wozroždeniýe» taslama-gurluşyk kompaniýalar topary bilen gatnaşyklaryň çäklerinde oňyn tejribe toplanandygyny we soňky birnäçe ýylyň dowamynda bu kompaniýanyň ýurtda gurluşygy alnyp barylýan ýol-ulag düzüminiň birnäçe iri desgalarynyň potratçysy bolandygyny kanagatlanma bilen belledi.

Igor Bukato ýolbaşçylyk edýän holdinginiň öz borçnamalarynyň üstünlikli ýerine ýetirilmegine örän jogapkärçilikli çemeleşjekdigini nygtady.

Duşuşygyň barşynda döwlet Baştutany we myhman özara bähbitli ýörelgelere esaslanýan hyzmatdaşlygyň geljekki ugurlaryny ara alyp maslahatlaşdylar. Işewür Prezident Serdar Berdimuhamedowa düzümleýin desgalaryň gurluşygy boýunça kompaniýa ynanylan taslamalarda alnyp barylýan işleriň ýagdaýy barada hasabat berdi.

Prezident Serdar Berdimuhamedow Türkmenistanyň täzeçil ösüş ýoluna düşmek bilen, milli ykdysadyýetiň ähli pudaklaryna sanly tehnologiýalary, ylmy-tehniki ösüşiň gazananlaryny ornaşdyrmaga, pudaklaýyn düzümleri düýpli döwrebaplaşdyrmaga möhüm ähmiýet berýändigini belledi.

Igor Bukato daşary ýurtlaryň işewür toparlarynyň netijeli iş alyp barmaklary ugrunda giň mümkinçilikleriň döredilen ýeri bolan Türkmenistan bilen hyzmatdaşlygy ösdürmegiň ýolbaşçylyk edýän kompaniýasy üçin uly hormatdygyny nygtap, «Wozroždeniýe» taslama-gurluşyk kompaniýalar toparynyň ynamy ödemek we öz üstüne alan borçnamalaryny üstünlikli ýerine ýetirmek ugrunda ähli zerur tagallalary etjekdigine ynandyrdy.