Aşgabatda 3 gün dowam eden «Türkmenistanyň nebiti we gazy —2022» (OGT—2022) halkara maslahaty we sergisi öz işini tamamlady.

Maslahatyň soňky gününde sylaglanyş dabarasy geçirildi. Onda Türkmenistanyň öňden gelýän hyzmatdaşlarynyň üçüsi Energy Excellence Award baýragyna eýe boldy. Olar Dragon Oil, CNPC we Petronas kompaniýalary bolup, bularyň hemmesi şu ýyl Türkmenistanyň nebit-gaz pudagynda möhüm netijeleri gazandylar.

«OGT—2022» forumy pudak ýolbaşçylary, bilermenler we alymlar üçin nebit-gaz pudagynyň global howanyň üýtgemegi, gaýtadan dikeldilýän energiýa çeşmelerine geçmek we maýa goýum mümkinçiliklerini we logistika ugurlaryny diwersifikasiýa etmegiň zerurlygy bilen baglanyşykly meselelere has täsirli bolmagyna goşant goşmakda amatly meýdança öwrüldi.

Mundan başga-da, maslahat we sergi gyzyklanýan taraplara türkmen hyzmatdaşlary bilen aragatnaşyk gurmak we işewür gatnaşyklar üçin mümkinçilik döretdi.

«Türkmennebit» döwlet konserni bilen Hazar deňziniň türkmen böleginiň 19-njy blogunda 3D seýsmiki gözlegleri geçirmek baradaky şertnama gol çekilmegi forumyň esasy wakalarynyň biri boldy. Bu şertnamanyň kömegi bilen 19-njy blok boýunça täze geologiki maglumatlar alnar.

Şunuň bilen birlikde-de, jemi 100 million dollarlyk 12 ylalaşyk we şertnama baglaşyldy.

Türkmenistanyň ýangyç we energetika toplumynyň ajaýyp wakalarynyň birine öwrülen «OGT—2022» sergisine 500-den gowrak milli we daşary ýurt wekili, şeýle hem 45 ýurtdan 200-den gowrak kompaniýa we 100-e golaý wekiliýet gatnaşdy.