Ginnesiň rekordlar kitabynyň web-saýtynda habar berlişi ýaly häzirki wagtda Ýer ýüzüniň iň uzak ýaşan ynsany hökmünde Andre atly fransuz zenanyny resmi yglan edýär (asylky ady Lýusil Rendon bolan bu zenan 1904-nji ýylyň 11-nji fewralynda Fransiýada doglupdyr). Onuň ýaşy 118 ýyl 73 güne deňdir.
Mundan ozal dünýäde iň uly ýaşly hasap edilen Kane Tanakanyň aradan çykmagy bilen, Andre iň uzak ýaşly adam hökmünde rekord netijesine eýe diýlip hasap edildi.
Uzak ýaşly Andre bütin ömrüniň dowamyny işlemek bilen, Beýik Watançylyk urşy ýyllarynda mekdepde mugallym bolup zähmet çekdi. Uruşdan soň ol katolik ybadathanasynda keşiş bolmazyndan öňinçä 28 ýyllap ýetim çagalara terbiýeçilik edip, Oern-Roin-Alp etrabyndaky Wişi hassahanasynda işledi.
Ömrüniň agramly bölegini dine gulluk edip geçiren Andre keşişleriň hatarynda hem iň uly ýaşly hasaplanyp geldi. Golaýda bolsa ol COVID-19 pandemiýa ýokanjyndan soň sagalan iň uly ýaşly adam bolup rekord kitabyna adyny ýazdyrdy.
Andre soňky 12 ýyly özüniň garrylar üçin niýetlenen öýünde ýaşap gelýär. Her gün iş stolunyň başynda oturyp, ownuk-uşak işler bilen meşgullanýar. Şeýle-de ol her gün iň halaýan zady bolan şokolad bilen bir bulgur çakyr içýär.
Täsin ýeri, ozal iň uly ýaşly zenanlaryň biri bolan Žanna Luiza Kalman hem milleti boýunça fransuz bolup, her günde şokolad bilen çakyr içýän eken. Ol 122 ýyl 164 gün ýaşap aradan çykypdyr.
