Balkanabadyň «Nebitçi», Marynyň «Merw» toparlaryndan soň geçen ýyl Türkmenistanyň çempionatynda şowsuz çykyş eden «Energetik» futbol topary hem şu günler Aşgabatda okuw-türgenleşik ýygnanyşygyny geçýär. Bu barada «SportMedia» habar berdi.
«Energetigiň» paýtagtdaky türgenleşikleri düýn ― 16-njy martda başlady. Topar bir hepde Aşgabatda türgenleşer. Şol türgenleşikleriň çäginde ýerli toparlaryň birnäçesi bilen ýoldaşlyk duşuşyklary meýilleşdirilýär.
Täze möwsümiň bosagasynda «Energetigiň» düzümini 10 futbolçy bilen güýçlendirendigini habar beripdik. Has takygy, «Energetigiň» düzümine «Merwiň» 7 oýunçysy geçdi – Rahmet Şermetow, Bahtyýar Hojaahmedow, Döwletgeldi Mirsultanow, Begenç Temriýew, Arslan Ýusupow, Samed Samedow, Melis Rizaýew.
«Şagadamdan» Guwançgeldi Ýagmyrow, «Aşgabatdan» Şamämmet Agamämmedow hem-de 2020-nji ýylyň futbol möwsüminde «Şagadam» toparynda çykyş eden Musa Nurnazarow hem hünär ýollaryny «Energetik» toparynda dowam ederler.
Aşgabatdaky ýoldaşlyk duşuşyklarynda täze futbolçylaryň topara uýgunlaşmagy üçin şertler dörediler.
