Şu ýyl Türkmenistanda ylmyň ugurlary boýunça aspirantura 29 adam kabul ediler hem-de ylymlaryň kandidaty alymlyk derejesine dalaşgärlige 66, ylymlaryň doktory alymlyk derejesine dalaşgärlige 10 adam hasaba alnar. Bu barada Türkmenistanyň Ylymlar akademiýasynyň aspirantura bölüminiň müdiri Gülälek Annanepesowa «Türkmenistan» gazetiniň habarçysyna maglumat berdi.
Bu babatda geçen ýyldaky jemi görkeziji 67 adam bolan bolsa, bu ýyl 105-e ýetirildi.
Olaryň ylym ugurlarynyň hatarynda fizika-matematika, himiýa, biologiýa, tehniki, oba hojalyk ylymlary, taryh ylymlary we arheologiýa, ykdysady, filologiýa, hukuk, pedagogika, lukmançylyk, harby, syýasy ylymlar, şeýle-de ýer baradaky ylymlar bar.
Mälim bolşy ýaly, Türkmenistanyň Prezidenti 2021-nji ýylyň 12-nji fewralynda geçiren Ministrler Kabinetiniň giňişleýin mejlisinde degişli Buýruga gol çekdi. Resminama laýyklykda, 2021-nji ýylda ylmyň ugurlary boýunça aspirantura kabul ediljek aspirantlaryň, alymlyk derejelerine dalaşgärlige hasaba alynjak dalaşgärleriň sany, şeýle hem kliniki ordinatura kabul ediljek ordinatorlaryň sany tassyklandy.
