Malaýziýanyň futbol boýunça çempionatynyň Superligasynyň Birinji tapgyrynda PDRM öz meýdanynda «Sabah» bilen deňme-deň oýnady (0:0) diýip, «Metro» habar berýär.
Duşuşykda türkmen futbolçylary Şöhrat Söýünow bilen Serdar Geldiýew PDRM-iň esasy düzüminde meýdana çykdy. Şeýlelikde, ildeşlerimiz Malaýziýanyň çempionatyndaky ilkinji resmi duşuşygyny geçirdiler.
PDRM futbol topary Kuala-Lumpur şäherine wekilçilik edýär. 2019-njy ýyldaky futbol möwsüminde topar Malaýziýanyň çempionatynyň ikinji derejeli ligasynda ýaryşdy we dördünji orny eýeläp, saýlama duşuşyklaryň netijesinde Superliga çykdy.
Duşuşygyň öňüsyrasynda PDRM-iň baş tälimçisi Işak Kunju Mohammed türkmen futbolçylarynyň täze topara uýgunlaşmagy bilen bagly şeýle diýdi:
«Serdar Geldýew iňlis dilini bilýär, ýöne Şöhrat Söýünow bilenok. Men hemişe Serdar bilen aragatnaşyk saklaýaryn, ol meniň tabşyryklarymy Şöhrada terjime edip berýär. Ikisi-de Türkmenistanyň milli ýygyndysynyň esasy wekilleriniň hatarynda, şonuň üçin biri-biriniň güýçli taraplaryny bilýärler. Olar toparymyzdaky her bir oýunçy bilen düşünişip, Malaýziýanyň futbolyna uýgunlaşýarlar. Möwsümiň öňýanyndaky türgenleşiklerde olar özlerini gowy tarapdan görkezdiler. Men olaryň toparyň üstünliklerine goşant goşup biljekdigine ynanýaryn».
