Türkmenistanyň Daşary işler ministrliginiň Halkara gatnaşyklary institutynda hormatly Prezidentimiz Gurbanguly Berdimuhamedowyň başlyklyk etmeginde düýn «Awaza» milli syýahatçylyk zolagynyň Kongresler merkezinde geçirilen Araly halas etmegiň Halkara gaznasyny esaslandyryjy döwletleriň Baştutanlarynyň sammitiniň jemlerine bagyşlanan maslahat geçirildi.

Çärä ýurdumyzyň daşary syýasat edarasynyň, jemgyýetçilik guramalarynyň wekilleri, bilermen-ekologlar, syýasatşynaslar, ýokary okuw mekdepleriniň professor-mugallymlary, talyp ýaşlar, köpçülikleýin habar beriş serişdeleriniň ýolbaşçylary gatnaşdylar. Olar öz çykyşlarynda Hazar deňziniň türkmen kenarynda Gazagystan Respublikasynyň Prezidenti Nursultan Nazarbaýewiň, Täjigistan Respublikasynyň Prezidenti Emomali Rahmonyň, Özbegistan Respublikasynyň Prezidenti Şawkat Mirziýoýewiň we Türkmenistanyň Prezidenti tarapyndan çagyrylan Gyrgyz Respublikasynyň Prezidenti Sooronbaý Žeenbekowyň gatnaşmagynda geçirilen sammitiň aýratyn ähmiýetini bellediler. Şonda döwletleriň Prezidentleri AHHG-nyň işini kämilleşdirmegiň anyk ugurlaryny kesgitlediler hem-de Aral meselesini çözmekde ýurtlaryň özara gatnaşyklaryny berkitmäge tarap ýolda ýene bir ädim ätdiler.

Döwlet Baştutanlarynyň maslahatynyň barşynda gaznanyň işini kämilleşdirmegiň anyk ýollary bellenildi hem-de Aral meselesiniň çözgüdini tapmakda ýurtlaryň hyzmatdaşlygyny pugtalandyrmagyň ýolunda netijeli çäreler geçirildi. Bu meselä içerki, sebit meselesi hökmünde seredilip bilinmez, şonuň üçin ony üstünlikli çözmegiň ýolunda dünýä bileleşiginiň goldawy, täze, toplumlaýyn halkara çemeleşmesi, BMG-niň bu işe yzygiderli gatnaşmagy zerurdyr.