Türkmenistan

1. Hytaýyň günortasyndaky Uly aýlagdan Türkmenistana ilkinji göni ýük howa gatnawy amala aşyryldy. «Türkmenhowaýollarynyň» uçary Şençžen-Baoan howa menzilinden elektrik enjamlaryny,egin-eşikleri we beýleki harytlary Aşgabada getirdi. Şeýle hem bu sebitleriň arasynda söwda gatnaşyklaryny berkitmek maksady bilen, Şençženden Merkezi Aziýa amala aşyrylan uçuşdyr.

2. Ýerewan döwlet uniwersitetinde Magtymgulynyň doglan gününiň 300 ýyllyk ýubileýine bagyşlanan birnäçe sapaklary geçirmek meýilleşdirilýär. Bu barada ÝDU-nyň rektory Ogannes Ogannisýan Türkmenistanyň ilçisi Muhammetgeldi Aýazow bilen geçirilen duşuşygyň dowamynda belläp geçdi. Şeýle hem ermeni tarapy Ermenistanyň ylmy žurnallarynda Magtymguly Pyragy barada makalalary çap etmegi we nusgawy şahyryň döredijiligine bagyşlanan halkara maslahaty geçirmegi teklip etdi.

3. Lebap welaýatynyň 5 müňe golaý mekdep okuwçysy täze okuw ýylyny täze mekdeplerde garşy alarlar. 1-nji sentýabrda 8 sany umumybilim berýän orta mekdebi we birnäçe çagalar baglaryny ulanmaga bermek meýilleşdirilýär. Täze mekdepler Köýtendag, Halaç, Saýat, Çärjew we Dänew etraplarynda açylar. Häzirki günlerde ähli mekdepleriň gurluşyk işleri tamamlaýjy tapgyrda alnyp barylýar. Käbir mekdeplerde eýýäm synp otaglary zerur enjamlar bilen üpjün edlip başlandy.

4. Bilim ministrliginiň buýurmasy esasynda Türkmenistanyň Döwlet çaphana gullugy her ýyl umumybilim berýän orta mekdepler üçin türkmen we daşary ýurt dillerindäki okuw kitaplarynyň, gollanmalarynyň we iş depderleriniň birnäçesini çykarýar. Şu okuw ýyly üçin taýýarlanan täze kitaplaryň hatarynda birinji synplar üçin niýetlenen birnäçe okuw kitaplary, 6-njy synplar üçin nemes dili boýunça täzelenen okuw kitaby, 9-njy synplar üçin «Türkmen dili» we «Türkmenistanyň döwlet we hukuk esaslary» kitaplary, türkmen we rus dillerinde bilim alýan 10-njy synp okuwçylar üçin bolsa «Edebiýat», «Algebra», «Geometriýa», «Himiýa», «Informatika» we «Özüňi alyp barmagyň medeniýeti» dersleri boýunça täze okuw kitaplary bar.

5. Türkmen telekeçileri «Smart China Expo 2023» atly intellektual senagatyň halkara sergisine gatnaşmagy meýilleşdirýärler. Sergi 4 – 6-njy sentýabr aralygynda Hytaýyň Çunsin şäherinde geçiriler. Sergilenýän önümler onlaýn we oflaýn görnüşde görkeziler.

Dünýäde

6. Aerokosmik we tehnologik innowasiýalaryň dünýä festiwaly «Teknofest» täze taslamalaryň (startaplaryň) bäsleşigine gatnaşmak üçin ýüztutmalary tabşyrmagyň möhletiniň 2023-nji ýylyň 31-nji iýula çenli uzaldylandygyny yglan edýär. Bäsleşik 2023-nji ýylyň awgust – sentýabr aýlarynda Ankarada we Izmirde geçiriljek festiwalyň çäklerinde guralar. Bäsleşik täze taslamalary (startaplary) ösdürmek bilen baglanyşykly 10 sany ugry öz içine alýar. Ýeňijilere umumy möçberi 7 million türk lirasyna deň bolan baýraklar gowşurylar.

7. «TikTok-da» tekst habarlaryny döretmek we paýlaşmak mümkinçiligi peýda boldy. Täzeligiň çäklerinde stierleri goýmak, heştegleri döretmek, reňk düşegini (fony) üýtgetmek we iberilmedik ýazgylary garalamada saklamak mümkinçilikleri hem girizildi. Tekst habarlarynyň möçberi 100 belgi bilen çäklendirilendir, şeýle hem ulanyjylar ýazgylara teswir (kommentariýa) goýup bilerler. «Edil wideoly ýa-da suratly postlarda bolşy ýaly, siz beýleki akkauntlary belläp bilersiňiz, şeýle hem aktual mowzulara ýa-da möhüm wakalara degişli heştegleri goşup bilersiňiz» diýip, «TikTok» ulgamynyň wekilli habar berdi.

Sport habarlary

8. Daşoguzda 2007-2008-nji ýyllarda doglan ýetginjek oglanlaryň we gyzlaryň arasynda basketbol boýunça Türkmenistanyň birinjiligi başlanýar. Bäsleşik 27-nji iýuldan 6-njy awgust aralygynda geçiriler. Ilki gyzlar özara bäsleşerler, soňra bolsa oglanlar. Medallar ugrundaky göreşe ýurduň ähli welaýatlaryndan we paýtagt Aşgabatdan toparlar gatnaşarlar. Zenanlaryň arasynda basketboly ösdürmäge aýratyn ähmiýet berler. 30-njy iýulda Daşoguzda FIBA-nyň gyzlaryň arasynda bu sportuň meşhurlygyny artdyrmaga gönükdirilen «Her World, Her Rules» maksatnamasy durmuşa geçiriler.

9. Türkmen goragçysy Bagtyýar Gürgenow «Kyzylkum» bilen Almalygyň «AGMK» toparynyň arasynda geçirilen dostluk duşuşygynda gol bilen tapawutlandy. «Kyzylkum» türgenleşik ýygnanyşygynda 4 dostluk duşuşygyny geçirdi, düzümini birnäçe oýunçylar bilen güýçlendirdi we Özbegistanyň Superligasynyň ikinji aýlawyna gowy taýýarlandy. «Kyzylkum» indiki duşuşygy 30-njy iýulda futbol boýunça Özbegistanyň Superligasynyň 14-nji tapgyrynda Namanganyň «Nawbahor» toparyna garşy geçirer. Bagtyýar Gürgenowyň «Kyzylkuma» geçýändigi barada iýul aýynyň ortalarynda mälim edilipdi. Ozal 25 ýaşly goragçy Türkmenistanyň çempionatynda «Köpetdagyň» we «Altyn asyryň» düzüminde oýnapdy.