Türkmenistan

1. Türkmenistanyň Prezidenti Serdar Berdimuhamedow welaýatlaryň häkimleriniň hem-de obasenagat toplumyna gözegçilik edýän wise-premýer Taňryguly Atahallyýewiň gatnaşmagynda geçirilen wideoşekilli iş maslahatynyň dowamynda oba hojalyk işleriniň ýokary hilini üpjün etmegi tabşyrdy.

2. Türkmenistanyň Suratkeşler birleşmesiniň Sergiler merkezinde milli binagärlik we şähergurluşyk pudagyna degişli soňky ýyllarda döredilen iň gowy eserleriň, şeýle hem Aşgabat we Arkadag şäherleri üçin hödürlenýän täze binagärlik taslamalarynyň sergisi açyldy. «Arkadagly eýýamyň binagärligi» atly sergi Aşgabat şäher häkimliginiň hem-de Türkmenistanyň Gurluşyk we binagärlik ministrliginiň goldaw bermeginde ýurduň Arhitektorlar birleşmesi tarapyndan guralýar.

3. Türkmenistan «Asiavision» guramasynyň iň işjeň agzalarynyň hatarynda ilkinji 10-luga girdi. Bu 10-12-nji iýul aralygynda Malaýziýada geçirilýän «ABU Global News Forum 2023» atly Ählumumy habarlar forumynyň birinji gününiň jemi jemlenende mälim boldy. Halkara maglumat merkeziniň habar bermegine görä, Türkmenistan geçen 12 aýda 300 töweregi material iberip, abraýly sanawyň (reýtingiň) ýedinji ornuny eýeledi.

4. Türkmenistanyň Döwlet medeniýet merkeziniň Mukamlar köşgünde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Ömrümiň manysynyň dowamaty» atly täze kitabynyň tanyşdyrylyş dabarasy boldy. Özboluşly mazmuny bilen tapawutlanýan bu kitap Garaşsyz, hemişelik Bitarap Türkmenistanyň ýeten belent sepgitleri, türkmen halkynyň müňýyllyklaryň dowamynda nesilden-nesle geçip gelýän milli ruhy-ahlak gymmatlyklary baradaky maglumatlary, awtoryň çuňňur manyly pikir-garaýyşlaryny özünde jemleýär.

5. Türkmenistanyň Daşary işler ministrliginiň Halkara gatnaşyklar instituty “Parahatçylygyň ýaş çaparlary” atly akyl-paýhas bäsleşiginiň üçünji möwsüminiň başlanandygyny habar berdi. Bäsleşik Ýaş diplomatlar mekdebi tarapyndan geçirilýär we ýurduň orta mekdepleriniň ýokary synp okuwçylaryny gatnaşmaga çagyrýar. Üçünji möwsüm 8 saýlama oýundan, iki ýarym finaldan we finaldan ybarat bolar. Umumy mowzuk – «Beýik Magtymguly Pyragynyň ylmy – umumadamzat gymmatlyklarynyň milli şamçyragy».

6. Türkmen paýtagtynda Wernadskiý şaýolundaky Moskwanyň uly döwlet sirkiniň hem-de Reňkli bulwardaky Nikulin adyndaky Moskwa sirkiniň artistleriniň gastrol çykyşlary başlandy. Meşhur toparlaryň iň gowy çykyşlaryny öz içine alýan ajaýyp tomaşalary Türkmenistanyň Döwlet sirkiniň meýdançasynda 23-nji iýula çenli her gün geçiriler.

Dünýäde

7. Germaniýanyň iň uly «Bild» gazetinde täze baş redaktor – emeli aň (intellekt) peýda boldy. EA-da tekst redaktorynyň, korrektoryň, sekretaryň we surat redaktorynyň wezipeleri hem giriziler. «Bild» gazetiniň wekilleri žurnalistleriň käbir jogapkärçilikleriniň emeli aňa geçirilmegi olara döredijilige we tekst ýazmaga has köp üns bermek üçin mümkinçilik döreder diýip hasaplaýarlar. Geljek ýylyň başyna EA-ny baş redaktor hökmünde doly ornaşdyrmak meýilleşdirilýär.

8. «Roskosmos» we Gagarin adyndaky Kosmonawtlary taýýarlaýyş merkezi kosmonawtlar toparyna açyk seçip almak işleriniň başlanandygyny habar berdiler. Bäsleşige 35 ýaşa ýetmedik we bellenilen ähli talaplara laýyk gelýän Russiýanyň islendik raýaty gatnaşyp biler. Bu Russiýanyň kosmonawtlar topary üçin dördünji açyk seçip almak işidir. 2012 we 2018-nji ýyllarda sekiz dalaşgär synaglardan geçdi, 2021-nji ýylda synaglardan dört adam geçdi. Häzirki wagtda topar 26 kosmonawtdan ybarat.

Sport habarlary

9. Yssyk-Kölüň kenarynda 6-18 ýaşa çenli küştçileriň arasynda küşt boýunça Günbatar Aziýanyň çagalar we ýaşlar çempionaty tamamlandy. Türkmen türgenleri nusgawy küştde bir medal gazandylar. Begli Annagylyjow 6 ýaşa çenli derejede 7 utuk bilen bürünç medala mynasyp boldy. Bäsleşige Bangladeş, Hindistan, Gazagystan, Gyrgyzystan, Oman, Şri-Lanka, Täjigistan, Türkmenistan, Özbegistan ýaly döwletlerden we Halkara küşt federasiýasynyň (FIDE) baýdagy astyndaky oýunçylaryň jemi 280-den gowragynyň gatnaşandygyny bellemek gerek.

10. Futbol boýunça Gyrgyzystanyň kubogynyň birinji ýarym final oýnunda «Abdyş-Ata» Oş şäheriniň «Alaý» toparyny kabul etdi. Duşuşyk Kantdaky «Nitro Arena» stadionynda geçirildi we 0:0 hasabynda deňme-deň tamamlandy. Türkmen goragçysy Teýmur Çaryýew ilkinji minutlardan meýdança girdi we oýny doly oýnady. Kantly futbolçylar oýundan öňki türgenleşige toparyň şikes alan hüjümçisi Nurmat Sakebaýewi goldamak üçin ýörite köýnekçelde (futbolkada) çykdylar. Beýleki ýarym final duşuşygynda «Kara-Balta» öz meýdançasynda «Muras Ýunaýtedi» kabul etdi we 1:4 hasabynda ýeňlişe sezewar boldy. Gyrgyzystanyň kubogynyň 1/2 finalynyň gaýdyp jogap duşuşyklaryny 15-16-njy iýulda, final duşuşygyny bolsa 31-nji awgustda geçirmek meýilleşdirilýär.