Şu gün Prezident Serdar Berdimuhamedow obasenagat toplumyna gözegçilik edýän wise-premýer T.Atahallyýewiň hem-de ýurduň welaýatlarynyň häkimleriniň gatnaşmagynda sanly ulgam arkaly iş maslahatyny geçirdi. Bu barada «Watan» habarlar gepleşiginde habar berildi.
Iş maslahatynda ýurduň oba hojalyk toplumynda we welaýatlarynda alnyp barylýan işleriň barşy bilen bagly meselelere garaldy.
Ahal, Daşoguz, Lebap we Mary welaýatlarynyň häkimleri, şeýle-de Balkan welaýatynyň häkiminiň wezipesini wagtlaýyn ýerine ýetiriji J.Annaýew ekin meýdanlarynda alnyp barylýan möwsümleýin oba hojalyk işleri barada hasabat berdiler.
Hasabatlarda ýygnalan bugdaý hasylynyň kabul ediş bölümlerinden ammarlara we elewatorlara öz wagtynda hem-de ýitgisiz daşalýandygy, geljek ýylyň hasyly üçin bugdaý ekiljek meýdanlarda sürüm we tekizleýiş işleriniň talabalaýyk ýerine ýetirilýändigi, gowaça ekilen ýerlerde ideg işleriniň agrotehnikanyň kadalaryna laýyklykda alnyp barylýandygy, welaýatlarda güýz möwsümi üçin ýeralmanyň, gök-bakja we beýleki oba hojalyk ekinleriniň ekişine görülýän taýýarlyk barada aýdyldy.
Degişli hasabatlarda Daşoguz we Lebap welaýatlarynyň şaly ekilen meýdanlarynda häzirki wagtda ideg işleriniň talabalaýyk alnyp barylýandygy, Mary welaýatynda bolsa gant şugundyrynyň ekişiniň meýilnama laýyklykda dowam edýändigi habar berildi.
Şeýle hem häkimler Oba milli maksatnamasyna we ýurdy 2022 — 2028-nji ýyllarda durmuş-ykdysady taýdan ösdürmegiň Prezident maksatnamasyna laýyklykda, şu ýyl welaýatlarda ýerine ýetirilmegi meýilleşdirilen gurluşyk işleriniň barşy barada hasabat berdiler.
Prezident Serdar Berdimuhamedow hasabatlary diňläp, oba hojalyk işleriniň talabalaýyk guralmagynyň, möwsümleýin oba hojalyk işleri ýerine ýetirilende agrotehnikanyň kadalarynyň berk berjaý edilmeginiň möhümdigini, onuň toprakdan bol hasyl almagyň esasy şertleriniň biridigini belledi we bu babatda häkimlere anyk tabşyryklary berdi.
Soňra wise-premýer T.Atahallyýew ýurtda dowam edýän oba hojalyk işleriniň barşy barada hasabat berdi. Hasabatda güýz möwsüminde ekilmegi meýilleşdirilýän ýeralmanyň we beýleki gök-bakja ekinleriniň ekiljek ýerlerini hem-de bu ekinleriň tohumlaryny möwsüme taýýarlamak boýunça degişli işleriň alnyp barylýandygy barada-da aýdyldy.
Döwlet Baştutany hasabaty diňläp, häzirki wagtda dowam edýän oba hojalyk işleriniň agrotehnikanyň kadalaryny berk berjaý etmek arkaly ýerine ýetirilmeginiň zerur talap bolup durýandygyny belledi we şunuň bilen baglylykda, wise-premýere bugdaý ekiljek meýdanlarda taýýarlyk işleriniň bellenilen möhletlerde we ýokary hilli geçirilmegini, gowaça meýdanlarynda, şeýle-de şaly ekilen ýerlerde ideg işleriniň talabalaýyk alnyp barylmagyny, gant şugundyrynyň ekişiniň meýilnama laýyklykda ýerine ýetirilmegini, güýz möwsüminiň ekiş işlerine ýokary guramaçylyk derejesinde taýýarlyk görülmegini gözegçilikde saklamagy tabşyrdy.
Prezident Serdar Berdimuhamedow iş maslahatyna gatnaşyjylara ýüzlenip, häzirki wagtda oba hojalyk pudagynyň öňünde durýan wajyp wezipeleriň üstünlikli ýerine ýetirilmegine jogapkärçilikli çemeleşmegiň möhümdigine ünsi çekdi hem-de bu ugurda alnyp barylýan ähli işleriň ýokary hilli geçirilmegini üpjün etmek babatda degişli tabşyryklary berdi.
