Eýranyň Aşgabatdaky Medeniýet merkezinde Eýran bilen Türkmenistanyň arasyndaky diplomatik gatnaşyklaryň ýola goýulmagynyň 30 ýyllygyna bagyşlanan baýramçylyk çäresi geçirildi.

Eýran Yslam Respublikasynyň Türkmenistandaky ilçisi Golamabbas Arbabhales çärä gatnaşan myhmanlary bu şanly sene bilen gutlady. Ol Eýran bilen Türkmenistanyň gatnaşyklarynyň möhüm ähmiýete eýedigini belledi we bu dostlukly döwletleriň agzybir raýatlaryna abadançylyk, parahatçylyk, berk maşgala abadançylygyny arzuw etdi.

Eýranyň Medeniýet merkeziniň başlygy Nawid Rasul dabara gatnaşan myhmanlara ýüzlenip, «Eýrany öwreniş» mowzugyndaky makala bäsleşiginiň netijelerini jemledi. Bäsleşigi guraýjylar Türkmenistanyň dürli ýerlerinden 70-den gowrak gatnaşyjynyň öz eserlerini iberendigini, makalalaryň ählisiniň bir-birinden üýtgeşikdigini we netijeleri jemlemegiň ýeňil düşmändigini aýtdylar.

Ýakymly aýdym-sazlar, ýürekden çykýan gutlaglar çäräniň bezegine öwrüldi. Dabaranyň geçirilen ýerinde ajaýyp dostanalyk we ýokary ruhubelentlik döreden gyzykly konsert boldy.

Eýranyň Aşgabatdaky Medeniýet merkeziniň iki ýurduň arasyndaky medeni gatnaşyklaryň köprüsidigini bellemelidiris. Bu ýerde Eýranyň gadymy halkynyň baý medeniýetini we özboluşlylygyny açyp görkezýän sergiler, film görkezilişleri we beýleki çäreler yzygiderli geçirilýär. Geçen hepde bu ýerde Eýran bilen Türkmenistanyň arasynda dostluk baýramçylygy geçirildi.

Şeýle-de, okaň:

• Türkmenistanyň Prezidenti EYR-nyň Prezidentine gutlag hatyny ýollady