Türkmenistanyň küşt boýunça milli ýygyndysy 17–28-nji fewral aralygynda Moskwa oblastynda geçirilen halkara «Russiýanyň küşt täji» festiwalyna gatnaşyp, ýurdumyza mynasyp wekilçilik etdi. Bu barada Türkmenistanyň Küşt federasiýasy habar berdi.

Russiýa Federasiýasynyň senatory, halkara grossmeýster Sergeý Karýakiniň ýolbaşçylygynda Moskwa oblastynyň Küşt federasiýasy tarapyndan guralan ýaryşa 20-den gowrak ýurtdan takmynan 500 küştçi gatnaşdy. Türkmenistanyň topary bu ýaryşa ýörite çakylygyň esasynda gatnaşdy.

Türkmen wekiliýetiniň iň görnükli netijeleriniň arasynda FIDE-niň zenanlar boýunça ussatlyga- dalaşgär Leýla Şöhradowanyň (reýtingi 2183) çykyşyny görkezmek bolar. Ol «A» ýaryşynda nusgawy küşt boýunça zenanlaryň arasynda 5-nji orny eýeledi. Küştçi halkara ussady derejesiniň kadasyny ýerine ýetirmekden ýarym utuk aralykda saklandy. «D» ýaryşynda Mähri Agamyradowa (reýtingi 1926) zenanlaryň arasynda 1-nji orny aldy, Jahan Rejepowa (reýtingi 2051) bolsa «C» blis ýaryşynda 16 ýaşdan kiçi ýetginjekleriň arasynda 3-nji orny eýeledi.

FIDE-niň zenanlar boýunça ussady Läle Şöhradowa (reýtingi 2110) ýaryşlaryň netijesi boýunça 22 reýting utugyny artdyrdy.

Erkekler ýygyndysynda halkara grossmeýster Meýlis Annaberdiýew (reýtingi 2424) ýokary bäsdeşlikli «A» ýaryşyna gatnaşyp, ony 17-nji orunda tamamlady. FIDE-niň ussady Amanmuhammet Hommadow (reýtingi 2269) reýtingini 31,4 utuk, Wepaly Halnyýazow (reýtingi 2195) bolsa 35,8 utuk ýokarlandyrdy.

Nusgawy küşt boýunça ýaryşlar şweýsariýa ulgamynda 10 tapgyrda, her oýna 90 minut we her göçüme goşmaça 30 sekunt berilmek şerti bilen geçirildi.