Türkmenistanyň daşary işler ministriniň orunbasary Mähri Bäşimowa Şweýsariýa Konfederasiýasynyň Türkmenistandaky (rezidensiýasy Baku şäherinde ýerleşýän) Adatdan daşary we Doly ygtyýarly ilçisi Tomas Şteli bilen duşuşyk geçirdi. Bu barada Türkmenistanyň DIM-niň metbugat gullugy habar berýär.

Duşuşygyň dowamynda taraplar Türkmenistan bilen Şweýsariýanyň arasyndaky ikitaraplaýyn hyzmatdaşlygyň häzirki ýagdaýyny hem-de ony ösdürmegiň geljekki mümkinçiliklerini ara alyp maslahatlaşdylar. Şeýle hem konstruktiw we özara hormata esaslanýan dialogy mundan beýläk-de pugtalandyrmaga ygrarlydyklary nygtaldy.

Gepleşiklerde halkara we sebit düzümleriniň, hususan-da, BMG-niň çäklerinde hyzmatdaşlygy ösdürmek meselelerine aýratyn üns berildi. Diplomatlar söwda-ykdysady hem-de medeni-ynsanperwer gatnaşyklary ösdürmegiň ugurlaryny ara alyp maslahatlaşdylar we şu ýylyň dowamynda bilelikdäki çäreleri geçirmek boýunça pikir alyşdylar.