Girmek
13-nji fewralda Türkmenistanyň Saud Arabystany Patyşalygyndaky ilçihanasy 2025-nji ýylyň «Halkara Parahatçylyk we ynanyşmak ýyly» diýlip yglan edilmegine bagyşlanan çäre gurady. Bu barada daşary syýasat edarasy habar berýär.
Oňa diplomatlar, Patyşalykda ýaşaýan türkmen diasporasynyň we köpçülikleýin habar beriş serişdeleriniň wekilleri gatnaşdylar.
Tanyşdyryş dabarasynyň dowamynda Türkmenistanyň Saud Arabystany Patyşalygyndaky ilçisi şu ýylyň dowamynda geçirilmegi meýilleşdirilýän Türkmenistanyň hemişelik bitaraplygynyň 30 ýyllygyna bagyşlanan çäreler barada habar berdi.
Şeýle hem Türkmenistanyň Prezidenti Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň kitaplarynyň tanyşdyrylyş dabarasy geçirildi.
Türkmen halkynyň Milli Lideri, Türkmenistanyň Halk Maslahatynyň Başlygy tarapyndan öňe sürlen «Dialog – parahatçylygyň kepili» atly halkara gatnaşyklarynyň filosofiýasynyň ähmiýeti nygtaldy.
Gatnaşyjylar Halkara parahatçylyk we ynanyşmak ýylynda durmuşa geçirilmegi meýilleşdirilýän halkara derejesindäki Türkmenistanyň täze başlangyçlary bilen tanyşdyryldylar.