Türkmenistanda

1. 18-20-nji noýabrda Türkmenistanda Türkiýe Respublikasynyň Medeniýet günleri geçiriler. Çäreler Aşgabatda we Türkmenabatda bolar. Medeniýet günleriniň çäklerinde birnäçe konsertler geçiriler, olarda türk sungat işgärleri çykyş ederler. Şeýle hem Türkiýäniň amaly-haşam sungatynyň sergisi guralar.

2. Türkmenistanyň nebit we gaz boýunça döwlet konsernleri 2024-nji ýylyň 24-25-nji aprelinde Fransiýanyň paýtagtynda ýurduň energetika ulgamyna daşary ýurt maýa goýumlaryny çekmek boýunça halkara forum geçirerler. Forum Türkmenistanyň energetika ulgamynyň dürli pudaklaryna daşary ýurtlardan göni maýa goýumlaryny çekmek üçin mümkinçilikleri giňeltmäge gönükdirilendir.

3. Türkmenistanyň Prezidenti Serdar Berdimuhamedow dikuçarda uçuş amala aşyryp, Aşgabatda onuň töwereklerinde ýaýbaňlandyrylan işleriň barşy bilen tanyşdy. Dürli maksatly binalaryň gurluşyklary bilen bir hatarda, şäheriň ýol-ulag düzüminiň desgalarynyň gurluşygyna, olaryň abadanlaşdyrylmagyna hem uly üns berilýändigi bellenildi. Döwrebap ýollar, seýilgäh zolaklary ekologiýa abadançylygyny üpjün edip, Aşgabadyň şähergurluşyk derejesini has-da belende göterýär.

4. Türkmenistanyň Daşoguz welaýatynyň Görogly etrabynda soňky 100 ýylda ikinji gezek üçem bäbekleriň dünýä inmegi hasaba alyndy. Olar Şahymerdan Şammyýewiň we Sülgün Töräýewanyň maşgalasynda dünýä indiler. Üç gyzjagaz – Dünýä, Dursun we Abat – 10-njy oktýabrda 10 sagat 10 minutda doguldylar. Täze doglan bäbekleriň atlaryny yzly-yzyna okasaň, olar bütin dünýäde parahatçylyk arzuwyny aňladar.

5. Noýabr aýynyň ahyrynda Oguzhan adyndaky «Türkmenfilm» birleşiginiň kino işgärleriniň nobatdaky topary nusgawy şahyr Magtymguly Pyragy hakynda dokumental filmi surata düşürmek üçin Özbegistana ugrar. Surata düşürmek işler gadymy Buhara şäherinde bolar. Topara «Türkmenfilmiň» ýaş režissýory Annadurdy Täşliýew ýolbaşçylyk eder, ol milli türkmen telewideniýesinde görkezilen «Binýat» atly doly göwrümli filmi bilen tanalýar.

Dünýäde

6. Nýu-Ýorkda geçirilen auksionda «Başaşak Jenny» ady bilen tanalýan ABŞ-nyň seýrek poçta markasy satyldy. Marka 1918-nji ýylda çykarylyp, onda gülkünç tipografik ýalňyşlyk goýberilipdir. Poçta biplanyny başaşak görnüşde şekillendirilen markany 76 ýaşly kolleksioner Çarlz Hak 2 million dollara satyn aldy. «Başaşak Jenny» dünýädäki iň meşhur we gymmatly poçta markalarynyň biridir. Ýalňyşlyk ýüze çykmazyndan öň, bu markalaryň 100-e golaýy ýaýradyldy.

7. «Ozon» Özbegistanda harytlaryň satuwyny ýola goýdy. Indi ýurduň ýaşaýjylary islendik sebitden sargytlar boýunça söwdany amala aşyryp bilerler. Eltip bermegiň möhleti, ortaça, 12 güne deňdir. «Ozon» 2024-nji ýylda Özbegistanda hususy logistika infrastrukturasyny, şol sanda eltip bermek gullugyny, sargytlary kabul etmek we bermek boýunça nokarlar zynjyryny, şeýle hem ammarlaryny işe girizmegi meýilleşdirýär.

Sport habarlary

8. Dünýä çempionatynyň ikinji saýlama tapgyrynyň çäklerinde Özbegistana garşy geçiriljek duşuşygyň öňüsyrasynda Türkmenistan milli ýygyndysynyň futbolçylary janköýerlere ýüzlendiler. Milli ýygyndynyň metbugat gullugy tarapyndan paýlaşylan wideoda Ruslan Mingazow, Rahat Japarow, Ata Geldiýew we Elman Tagaýew surata düşdüler. Futbolçylar janköýerleri «Aşgabat» stadionyna gelip, topary goldamaga çagyrdylar. Türkmenistan bilen Özbegistanyň milli ýygyndy toparlarynyň arasyndaky oýun 16-njy noýabrda ýerli wagt bilen sagat 19: 00-da «Aşgabat» stadionynda geçiriler.