Girmek
Türkmenistanda
1. Prezident Serdar Berdimuhamedow Esen Aýdogdyýewi Türkmenistanyň Russiýa Federasiýasyndaky Adatdan daşary we Doly ygtyýarly ilçisi wezipesine belledi. Esen Aýdogdyýew Türkmenistanyň Russiýadaky ilçisi wezipesinde Prezidentiň Permanyna laýyklykda, başga işe geçmegi sebäpli wezipesinden boşadylan Batyr Niýazliýewiň ornuna bellenildi.
2. Türkmenistanda Hasyl toýuna uly taýýarlyk görülýär. Noýabr aýynyň ikinji ýekşenbesinde Köpetdagyň eteginde 600 baş ahalteke atyny saklamaga niýetlenen döwrebap athananyň açylyş dabarasy, ylmy-amaly maslahat we Halkara ahalteke atçylyk sport toplumynda dabaralar geçiriler.
4. Türkmenistanyň Mejlisi Arkadag şäheriniň dolandyryş çägini giňeltmek hakynda Karar kabul etdi. Şeýlelikde, Ahal welaýatynyň Gökdepe etrabynyň 102 gektar ýerleri hem-de Aşgabat şäheriniň 17 gektar ýeri Arkadag şäheriniň dolandyryş çägine geçirildi. Kararda bellenilişi ýaly, bu çözgüt şäher hojalygynyň guramaçylyk we dolandyryş ulgamlarynda amatly şertleri döretmek maksady bilen kabul edildi.
5. Türkmenistanyň Prezidenti Serdar Berdimuhamedow Karara gol çekdi. Resminama laýyklykda, Aşgabat şäher häkimligine täze ýaşaýyş toplumynyň taslamasyny düzmek hem-de gurmak barada ýerli gurluşyk kärhanalary bilen şertnamalary baglaşmaga ygtyýar berildi. Karara laýyklykda, Gurtly ýaşaýyş toplumynda 30 sany 4 gatly, her biri 40 öýli we 16 sany 4 gatly, her biri 68 öýli döwrebap ýaşaýyş jaýlary gurlar. Şeýle hem 720 orunlyk orta mekdebiň, 320 orunlyk çagalar bagynyň, seýilgähiň, awtomobil ýollarynyň hem-de inženerçilik ulgamlarynyň gurluşygy göz öňünde tutulýar. Gurluşyk işlerine 2023-nji ýylyň noýabr aýynda başlamak we 2026-njy ýylyň sentýabr aýynda tamamlamak bellenildi.
Dünýäde
6. «Garri Potter» äleminiň muşdaklary Hagridiň külbesini kärendesine alyp, özlerini hakyky jadygöýler ýaly duýup bilerler. Jaý Angliýanyň gözel künjeginde ýerleşýär. Ol ýerde rahat ýaşaýyş ýaşamak üçin zerur zatlaryň hemmesi: myhman otagy, ýatylýan otag, hammam otagy we aşhana göz öňünde tutulypdyr. Külbäni kärendesine almagyň bahasy saýlanan senä baglydyr. Dekabr aýynda bir gije üçin 294 dollar talap edilýär.
7. Maui adasyndaky «Kealiýa» Milli ýabany tebigat goraghanasynda ýerleşýän howdan guraklyk sebäpli suwunyň düzümindäki duzuň derejesi köpelip, açyk gülgüne reňke boýaldy. Duzly gurşawda galobakteriýalaryň köpelmegi sebäpli suwuň bu reňke boýalandygy çak edilýär. Howdana akýan süýji suwuň azalmagy duzuň konsentrasiýasynyň ýokarlanmagyna getirdi we ony gyrmyzy galobakteriýalar üçin amatly ýere öwrüldi.
Sport habarlary
8. Mergen Orazowyň ýolbaşçylygyndaky Türkmenistanyň futbol boýunça milli ýygyndysy 2026-njy ýyldaky dünýä çempionatynyň saýlama ýaryşynyň ikinji tapgyrynyň oýunlaryna taýýarlyk görüp başlady. Okuw-türgenleşik ýygnanyşygy Aşgabatda geçirilýär. Baş tälimçi giňeldilen sanawa 30 oýunçyny girizdi. Noýabr aýynda Türkmenistanyň milli ýygyndysy iki duşuşyk geçirer: 16-njy noýabrda Aşgabatda Özbegistana garşy öz meýdançasynda, 21-nji noýabrda bolsa myhmançylykda Gonkonga garşy oýnar.
9. Türkmen söweşijisi Eziz Penjiýew 10-njy noýabrda Moskwada geçirilen «Fight Nights 120» ýaryşynda russiýaly Sergeý Tolmaçewden bogmak tilsimini ulanyp üstün çykdy. Birinji raund deňme-deň tamamlandy, iki söweşiji hem seresaplylyk bilen hereket etdi. Ikinji tapgyrda Penjiýew garşydaşyna basyş edip başlady we ony ýere ýykmagy başardy. Tolmaçewiň Penjiýewi ýokary galdyrmak synanyşygy şowsuz tamamlanandan soň, türkmen söweşijisi bogmak tilsimini ulandy we garşydaşyny ýeňlendigine boýun almaga mejbur etdi. Bu Penjiýewiň «Fight Night» ýaryşyndaky ilkinji ýeňişi boldy.