Türkmenistanda

1. Türkmenistanyň Prezidenti Serdar Berdimuhamedow Ykdysady hyzmatdaşlyk guramasynyň 16-njy sammitine gatnaşmak üçin Daşkent şäherine amala aşyran iş saparynyň çäklerinde Özbegistanyň Prezidenti Şawkat Mirziýoýew bilen duşuşyk geçirdi. Iki döwletiň Baştutanlary syýasy, söwda-ykdysady we ynsanperwer ugurlarda özara bähbitli hyzmatdaşlygy giňeltmegiň geljegini ara alyp maslahatlaşdylar. YHG-niň çäklerinde ykdysady hyzmatdaşlygy pugtalandyrmagyň meselelerine aýratyn üns çekildi.

2. Şu gün Aşgabatda, Söwda-senagat edarasynyň sergiler merkezinde telekommunikasiýa pudagynyň ösüşine bagyşlanan «Türkmentel – 2023» atly halkara serginiň açylyş dabarasy boldy. Foruma dünýäniň we Türkmenistanyň IT pudagynyň 200-den gowrak wekili gatnaşýar. Bu çäräniň guramaçylary hökmünde Türkmenistan Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentligi we Söwda-senagat edarasy çykyş edýär.

3. Yraga iberilýän türkmen tebigy gazynyň möçberi ýylda 9 milliard kub metre deň bolar. «Türkmengaz» döwlet konserniniň wekilleriniň Yrak Respublikasynyň wekiliýeti bilen geçiren duşuşygynyň netijeleri boýunça türkmen tebigy gazyny Yrak Respublikasyna ýerlemek, satyn almak, satmak boýunça şertnamanyň esasy täjirçilik şertleri barada Teswirnama gol çekildi.

4. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan Palestinanyň halkyna ynsanperwerlik kömegi iberildi. Türkmenistanyň Prezidenti Serdar Berdimuhamedowyň gol çeken Buýrugynda ynsanperwerlik kömeginiň ilkinji nobatda, palestin çagalary üçin niýetlenendigi bellenilýär. Ynsanperwerlik kömegi derman we saglygy goraýyş maksatly serişdelerden, dokma önümlerinden, şol sanda çagalar üçin ýörite egin-eşiklerden, ýorgan-düşeklerden, aýakgaplardan, azyk önümlerinden we beýleki harytlardan ybaratdyr.

5. Türkmenistanyň Medeniýet ministrligi 14 — 16-njy noýabr aralygynda Aşgabatda we Arkadag şäherinde geçirilejk «Bagtyýarlyk döwrüniň teatr sungaty» atly IV halkara festiwalyň meýilnamasyny köpçülige ýetirdi. Mýilnamada türkmen teatrlarynyň çykyşlary we myhman teatrlaryň sahna eserleri göz öňünde tutulýar. Festiwala gatnaşmak üçin Täjigistandan, Özbegistandan, Azerbaýjandan, Russiýa Federasiýasynyň Tatarystan Respublikasyndan we Gyrgyzystandan döredijilik toparlary Türkmenistana gelerler.

Dünýäde

6. Florida ştatynda awçylar agramy 90 kilograma barabar bolan äpet gara gaplaň pitonyny tutdular. Süýrenijini tutmaga bäş adamdan ybarat topar gatnaşdy. Pitonyň uzynlygy 5 metre deň boldy. Ele salnan pitonyň garnynda sugunyň galyndylary tapyldy. Gara gaplaň pitonlary Florida ştaty üçin zyýanly görnüşdir. Olar ýerli haýwanat dünýäsine howp salýarlar, çünki iri haýwanlary hem iýip bilýärler, şeýlelik bilen, ekosistemany üýtgedýärler we biodürlüligi bozýarlar.

7. Awstraliýanyň ikinji iň iri prowaýderiniň ulgamynda bolup geçen uly näsazlyk ýurduň gündogar kenarýakasyndaky birnäçe million ýaşaýjyny mobil aragatnaşyksyz we internetsiz galdyrdy. Näsazlygyň sebäbi häzirlikçe belli däl. Hökümet kiber hüjüm ähtimallygyny aradan aýyrýar. Prowaýder kompaniýasynyň wekilleri aragatnaşygy dikeltmek üçin ellerinden gelýän ähli zady edýändiklerini belleýärler, ýöne işi tamamlamak üçin belli bir möhleti kesgitlemeýärler.

Sport habarlary

8. 10-njy noýabrda türkmenistanly söweşiji Eziz Penjiýew meşhur «Fight Nights» rus promouşeni tarapyndan guralýan söweş agşamynda oktagona çykar. Oňa ýeňil bolmadyk synag – 3 raunda niýetlenen söweşde russiýaly Sergeý Tolmaçew bilen tutluşyk garaşýar. Eziz Penjiýew — iň ýeňil agram derejesinde çykyş edýär. Ol dzýudo boýunça sport ussatlygyna dalaşgärlik derejesiniň we söweş sambosy boýunça Moskwanyň çempionatynyň we Kubogynyň eýesidir. Türkmenistanly söweşiji üçin bu «Fight Nights» promouşenindäki ilkinji tutluşyk bolar.

9. Şu gün «Aşgabat» stadionynda «Merw» bilen «Altyn asyryň» arasynda duşuşyk geçiriler. Duşuşygyň öňüsyrasynda toparlaryň baş tälimçileri öňde boljak oýundan nämelere garaşýandyklaryny gürrüň berdiler.

― Duşuşyga sabyrsyzlyk bilen garaşýarys. Biziň üçin juda möhüm duşuşyk. Ilkinji duşuşykda «Altyn asyr» bilen deňeçer güýçde oýnap biljekdigimizi görkezdik. Bize diňe tejribe we üns ýetmedi. Geçen duşuşykdan gerekli netijeleri çykardyk. Ertir özümizi kanagatlandyrýan netijäni almaga çalşarys. Topar duşuşyga taýýar – diýip, «Merwiň» baş tälimçisi Witaliý Alikperow belledi.

― Biziň üçin bu diňe bir nobatdaky oýun däl, eýsem, bizde aýratyn ýakymly duýgulary oýarýan halkara ýaryş. Biz elmydama ýeňiş gazanmak isleýäris we munuň üçin öz mümkinçiliklerimiziň iň ýokary derejesini görkezmeli.Her bir duşuşyga ýaryşa gatnaşmak üçin däl-de, diňe ýeňiş gazanmak üçin çykýandygymyzy hem aýtmak isleýärin diýip, «Altyn asyr» toparynyň baş tälimçisi Ýazguly Hojageldiýew gürrüň berdi.