Türkmenistanda

1. Prezident Serdar Berdimuhamedow Türkmenistanyň «Arkadag» medaly bilen sylaglandy. Döwlet Baştutany bu ýokary sylaga ýurtda halkyň kanuny bähbitlerini goramak we üpjün etmek boýunça hukuk kepilliklerini döretmekde, aýratyn hemaýata we goldawa mätäç çagalary durmuşa uýgunlaşdyrmaga hem-de taýýarlamaga gönükdirilen guramaçylyk, kanunçylyk-hukuk, ykdysady çäreleriň toplumyny durmuşa geçirmekde, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işine yzygiderli goldaw bermekde bitiren aýratyn görnükli hyzmatlary üçin mynasyp boldy.

2. Türkmenistanyň «Halkbank» paýdarlar täjirçilik banky müşderiler üçin bir «Altyn asyr» bank kartyndan başga bir «Altyn asyr» bank kartyna pul geçirimlerini amala aşyrmak hyzmatynyň elýeterli bolandygyny habar berýär. Indi bankyň müşderileri bankomatlaryň, «Internet-bank» hem-de «Mobil-bank» hyzmatlarynyň üsti bilen birek-biregiň «Altyn asyr» bank kartyna 1000 manatdan ýokary bolmadyk möçberde pul geçirip bilýärler. Şeýlelikde, zerurlyk ýüze çykan ýagdaýynda raýatlar islendik ýerde, şol sanda smartfonlary arkaly pul geçirimlerini ýerine ýetirip bilerler.

3. Türkmenistan güýçli ýertitreme zerarly ejir çeken Owganystana ynsanperwerlik kömegini iberdi. Ynsanperwerlik ýüki derman we saglygy goraýyş maksatly serişdelerden, dokma, azyk önümlerinden ybaratdyr. Bu kömek owgan halkyna kyn gününde bildirilýän raýdaşlygyň we doganlyk goldawynyň nobatdak¬y beýanydyr.

4. Russiýanyň ondan gowrak ýokary okuw mekdepleriniň wekilleri Türkmenistanyň Söwda-senagat edarasynda geçirilýän «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergä gatnaşýarlar. Russiýanyň dürli sebitlerinden bilim edaralary Türkmenistanyň ýaşaýjylary üçin bakalawriat we magistratura okuw maksatnamalarynyň giň toplumyny hödürleýärler. Käbir ýokary okuw mekdepleri okuwa giriş üçin ýörite şertleri hödürleýär. Mysal üçin, Lobaçewskiý adyndaky Nižniý Nowgorod döwlet uniwersiteti türkmen ýokary okuw mekdepleriniň bakalawr maksatnamasyny tamamlap, hökmany iki ýyllyk iş tejribesini geçmezden ozal türkmenistanly talyplary magistratura maksatnamasy boýunça okuwa kabul etmäge taýyndyr. Munuň üçin olar ahyrky bahalaryny we diplomynyň bardygyny tassyklaýan resminama almalydyrlar.

5. «Beýik asyr», «Gurluş: Osman» taryhy seriallarynda baş keşpleri janlandyran türkiýeli meşhur aktýor Burak Özçiwit 14-15-nji oktýabrda Aşgabatda geçiriljek halkara film festiwalyna gatnaşar. Bu çärä Merkezi Aziýa ýurtlarynyň aktýorlary we režissýorlary, şeýle hem «Taksi» atly uruşly komediýa filmi arkaly meşhurlyk gazanan fransiýaly aktýor Eduar Montut gatnaşar. Şeýle hem festiwalyň çäginde «RT Doc» teleýaýlymy tarapyndan surata düşürilen ahalteke bedewleri baradaky dokumental filmiň ilkinji görkezilişi bolar.

6. Türkiýäniň daşary işler ministri Hakan Fidan daşary işler ministri Raşid Meredowyň çakylygy boýunça Türkmenistanda resmi saparda bolar. Saparyň dowamynda Türkmenistan bilen ikitaraplaýyn gatnaşyklar, şeýle hem häzirki sebit we halkara wakalary ara alnyp maslahatlaşylar.

Dünýäde

7. Beýik Britaniýaly professor saglakaý adamlara horlanmagyň täze usulyny maslahat berdi. Riçard Uaýzmanyň pikiriçe, artykmaç agramyň öňüni almak üçin saglakaý adamlara naharlananda stoldaky zatlary çep elinde tutmak ýeterlikdir. Bu usul çepbekeý adamlar üçin hem şeýledir – bu ýagdaýda sag eliňiz bilen naharlanmak maslahat berilýär. Alym bu usul bilen beýnini aldap, doýandygyň hakyndaky duýgyny döredip boljakdygyny habar berýär. Işlemeýän eliň adaty däl hereketleri iýmiti has haýal iýmäge mejbur edýär, şonuň üçin beýnide has köp nahar iýlendigi barada duýgy döreýär.

8. Hindistanly daýhanynyň aýaly adamsynyň adata görä, toý sowgady hökmünde sowgat beren 150 müň rupiýalyk altyn monjugyny tötänlikde gäwmişe iýdirdi. Ol aýal öý işlerini ýerine ýetirenden soň suwa düşmegi meýilleşdirýärdi, monjugyny çykardy we ony gäwmişi iýmitlendirmek üçin niýetlenen içi soýa samanly jama saldy. Mojugyny ýatdan çykaryp, ertesi gün irden içi samanly gabyny haýwana berdi. Gäwmiş samany iýdi, aýal bolsa ahyrsoňy şaý-sepini ýadyna saldy. Ol monjugyň öküz tarapyndan iýilendigine tiz göz ýetirdi we weterinar lukmanyna ýüz tutdy. Weterinar lukmanlar demir detektoryny ulanyp, monjugyň gäwmişiň aşgazanyndadygyny tassykladylar. Şaý-sepleri almak üçin haýwany operasiýa etmeli boldy. Öküz 60 tikin aldy we weterinarlaryň gözegçiligi astynda operasiýadan soň saglygyny dikeldýär.

Sport habarlary

9. Türkmenistanyň futbol boýunça milli ýygyndysy BAE-de türgenleşik ýygnanyşygyndaky ilkinji ýoldaşlyk duşuşygyny geçirip, ýurduň birinji diwizionynda çykyş edýän «Dubai United» toparyny ýeňdi. «Duşuşyk 3:1 hasabynda tamamlandy. Ýeňijileriň düzüminde Ruslan Mingazow, Myrat Annaýew hem-de Elman Tagaýew tapawutlanmagy başardylar. Mergen Orazowyň toparynyň Dubaýda geçirýän okuw-türgenleşik ýygnanyşygyndaky indiki garşydaşy BAE-niň häzirki çempiony «Şabab Al-Ahli» topary bolar. Duşuşygy 15-nji oktýabrda geçirmek meýilleşdirilýär.

10. 2028-nji we 2032-nji ýyllarda geçiriljek futbol boýunça Ýewropa çempionatlarynyň ýer eýeleri kesgitlenildi. Ýewro-2028 Beýik Britaniýada we Irlandiýada, Ýewro-2032 bolsa Italiýada we Türkiýede geçiriler. Ýaryşyň häzirki çempionynyň Italiýanyň milli ýygyndysydygyny we 2024-nji ýyldaky Ýewropa çempionatynyň Germaniýada geçiriljekdigini ýatladýarys. Oňa 24 topar gatnaşar. Germaniýa ýer eýesi ýurt hökmünde ýaryşa göni gatnaşmak hukugyny alýar.

11. Yslam Mahaçýew «UFC 294-de» Çarlz Oliweýranyň ýerine awstraliýaly söweşiji Aleksandr Wolkanowski bilen tutluşar. Oliweýra şikes alandygy sebäpli ýaryşdan çekildi, onuň gaşynyň üstünde çapygyň emele gelendigi habar berilýär. Bu tutluşyk 21-nji oktýabrda Abu-Dabide geçiriljek «UFC 294» ýaryşynyň esasy tutluşygy bolar.