Türkmenistan

1. Hazar deňziniň kenarynda «Awaza – 2023» atly halkara tans we folklor festiwaly badalga aldy. Oňa Türkmenistana, Täjigistana, Gazagystana, Russiýa, Hindistana we Özbegistana wekilçilik edýän toparlar gatnaşýarlar. Öňümizdäki günlerde festiwal birnäçe ajaýyp döredijilik çäreleri bilen dowam eder, ýapylyş dabarasy 16-njy iýunda geçiriler.

2. Türkmenistanda ulag-kommunikasiýalar pudagynyň talyplarynyň we hünärmenleriniň arasynda geçirilen hünär ussatlygy boýunça bäsleşigiň jemi jemledi. Bäsleşigiň şertlerine laýyklykda, oňa gatnaşyjylar dürli pudaklar boýunça innowasion taslamalaryny görkezdiler, Türkmenistanyň sanlylaşdyrma we telekommunikasiýa hyzmatlary pudagyndaky üstünlikleri bilen tanyşdyrdylar. Bäsleşigiň ýeňijilerine «Türkmenaragatnaşyk» agentligi tarapyndan Hormat hatlary we gymmatly bagaly sowgatlar gowşuryldy.

3. Türkmenistanyň daşary işler ministriniň orunbasary Wepa Hajiýew 19 – 20-nji iýun aralygynda BMG-nyň Nýu-Ýorkdaky ştab-kwartirasynda geçiriljek Terrorçylyga garşy görşmek boýunça Ýokary derejeli hepdeligiň çärelerine gatnaşar.

4. Türkmenistanyň ilçisi Muhammetgeldi Aýazow Ýerewanda Ermenistanyň Geofizika we inženerçilik seýsmologiýa institutynyň direktory Jon Karapetýan bilen duşuşdy. Söhbetdeşler işjeň hyzmatdaşlyk, iki ýurduň alymlarynyň köp sanly duşuşyklary, dürli halkara çärelerine gatnaşmak, seýsmologiki gözlegler ulgamynda tejribe alyşmak hakynda pikir alyşdylar. Duşuşygyň ahyrynda ilçi Aýazow Karapetýana Türkmenistanyň DIM-niň ýolbaşçysy Raşid Meredowyň täze şähergurluşyk taslamasynyň – döwrebap Arkadag şäheriniň açylyş dabarasyna gatnaşmaga çakylyk hatyny gowşurdy.

5. Aşgabatda BMG-niň binasynda Durnukly ösüş maksatlaryny durmuşa geçirmekde global çäreler bilen tanyşmak boýunça ýaşlar bilen duşuşyk geçirildi. DÖM-leri durmuşa geçirmekde ýaş nesliň möhüm ornuny açyp görkezmäge gönükdirilen bu duşuşyk BMG-niň Türkmenistandaky Ösüş maksatnamasy tarapyndan Döwletmämmet Azady adyndaky Türkmen milli dünýä dilleri instituty bilen bilelikde guraldy. BMGÖM-niň hünärmenleri ýaşlar bilen duşuşygyň dowamynda howanyň üýtgemegine garşy göreşde ýaş nesliň orny, şäherleri has durnukly etmegiň usullary, ýerlikli sarp ediş we galyndylary dolandyrmak, Aral deňziniň daşky gurşaw krizisi we Türkmenistanyň howanyň üýtgemegine garşy göreşmäge gönükdirilen halkara başlangyçlary ýaly mowzuklary ara alyp maslahatlaşdylar.

Dünýäde

6. «Kamaz-yň» ilkinji sürüjisiz ýük awtoulaglary Moskwa – Sankt-Peterburg ugry boýunça ýükleri daşap başlar. Russiýaly ýük daşaýjylar dünýäde ilkinji bolup «akylly ýol» hyzmatlary bilen hyzmatdaşlykda sürüjisiz ulaglar arkaly ýük daşamalaryny amala aşyryp başlarlar.

7. San-Fransiskodaky beýikligi 195 metrden gowrak bolan 58 gatly bina hünärmenleriň tagallalaryna garamazdan, egilmegini dowam edýär. Binagärler bu prosese täsir edip bilmejekdiklerini aýtmaga mejbur bolýarlar. Köp sanly gymmat öýleri we döwrebap restorany bolan bina 2009-njy ýylda ulanylmaga berildi. Ulanylmaga berleninden birnäçe ýyl soň onuň eglip başlandygy duýuldy. Şu güne çenli bina 40 santimetrden gowrak ýere çümdi we dikligine 73 santimetr egildi.

Sport habarlary

8. Şu gün Türkmenistanyň we Özbegistanyň toparlarynyň arasynda Merkezi Aziýanyň Futbol Assosiasiýasynyň çempionatynyň ikinji tapgyrynyň duşuşygy geçiriler. Türkmenistanda IPTV bolan köp sanly futbol janköýerleri duşuşygy «Futbol» we «Warziş» teleýaýlymlarynda göni ýaýlymda görüp bilerler. Duşuşyk Aşgabat wagty bilen 20:20-de başlanýar. Ýatlatsak, Merkezi Aziýa Futbol Assosiasiýasynyň çempionaty 10 – 20-nji iýun aralygynda Daşkende we Bişkekde geçirilýär. Birinji tapgyrda Türkmenistanyň milli ýygyndysy Täjigistan bilen deňme-deň oýnady.

9. «Liwerpulyň» öňki futbolçysy we «Aston Willa» toparynyň tälimçisi Stiwen Jerrard işini Saud Arabystanynyň «Al-Ittifak» toparynda dowam etdirer. Geçen ýylyň oktýabr aýynda Jerrardy «Aston Villa-dan» işden çykardylar. Şondan bäri ol işsiz galdy. «Al-Ittifak» geçen möwsüm Saud Arabystanynyň çempionatyny ýedinji orunda tamamlady.

10. Gaýgysyz Töräýew Gawanada geçirilýän agyr atletika boýunça Baş baýrakda kümüş medala mynasyp boldy. 19 ýaşly türgen bu üstünligi 81 kilograma çenli agram derejesinde gazandy. Töräýew umumylykda 319 kg agyrlyk göterip, indoneziýaly agyr atletikaçydan bir basgançak yza galdy. Gawananyň Baş baýragy Parižde geçiriljek Olimpiýa oýunlarynyň saýlama ýaryşlarynyň biridir. Bu ýaryşda Türkmenistanyň milli ýygyndysyna üç türgen, şol sanda 2020-nji ýyldaky Olimpiýa oýunlarynyň kümüş medalynyň eýesi Polina Guryýewa wekilçilik edýär.