Şu gün Halkara ynsanperwer ylymlary we ösüş uniwersitetinde Türkmenistanyň hem-de birnäçe daşary ýurtlaryň ýokary okuw mekdepleriniň talyp ýaşlarynyň arasynda geçirilen III açyk halkara matematika olimpiadasynyň (OMOUS — 2023) jemi jemlenip, ýeňijiler yglan edildi.

Ozal habar berşimiz ýaly, bu halkara olimpada — Türkmenistandan, Russiýadan, Eýrandan, Özbegistandan, Azerbaýjandan, Saud Arabystanyndan, Meksikadan, Germaniýadan, Wengriýada talyplaryň jemi 283-si gatnaşdy.

III açyk halkara matematika olimpiadanyň ýapylyk dabarasynda Halkara ynsanperwer ylymlary we ösüş uniwersitetiniň rektory Esen Aýdogdyýew, emin agzalary, olimpiada gatnaşan talyp ýaşlar çykyş etdiler. Olar öz çykyşlarynda nobatdaky gezek geçirilen olimpiadanyň geçirilişi, oňa gatnaşan talyplar üçin döredilen şertler barada gürrüň berdiler.

Halkara olimpiadanyň netijesine laýyklykda, Türkmenistan medal sanawy boýunça birinji orna mynasyp boldy. Türkmen talyplary olimpiadanyň şahsy görnüşinde altyn medallaryň 20-sine, kümüş medallaryň 37-sine, bürünç medallaryň bolsa 63-sine mynasyp boldular. Toparlaýyn tapgyrda bolsa 1 altyn, 2 kümüş medal gazandylar.

Halkara olimpiadada Russiýadan gelen talyplar olimpiadanyň şahsy bäsleşiginde 4 altyn, 1 kümüş, dört bürünç medallara, Özbegistandan gelen talyplar 5 kümüş, 10 bürünç, toparlaýyn tapgyrda bolsa üç bürünç medallara, Azerbaýjandan gelen talyplar olimpiadanyň netijesinde 2 kümüş, toparlaýyn görnüşde bolsa 1 bürünç medala, Meksikadan gelen talyp bolsa 1 altyn medala, Wengriýadan, Meksikadan, Germaniýadan, Saud Arabystanyndan gelen talyp ýaşlardan düzülen talyplar topary bolsa olimpiadanyň toparlaýyn bäsleşiginde kümüş medala mynasyp boldular.

Ýeri gelende belläp geçsek, Halkara ynsanperwer ylymlary we ösüş uniwersitetiniň guramagynda geçirilen III açyk halkara matematika olimpiadasynyň (OMOUS — 2023) dowam edýän günleri oňa gatnaşýan türkmen hem-de daşary ýurtly talyplar Aşgabat şäheriniň gözel künjeklerine, taryhy «Nusaý» galasyna gezelenç etdiler. Mundan başga-da uniwersitetiň çäginde geçirilen iýmit festiwalyna gatnaşdylar. Iýmit festiwalynyň dowamynda olimpiada gatnaşýan talyplar Türkmenistanyň bäş welaýatyna mahsus bolan milli tagamlar bilen tanyşdylar.