Biz birnäçe gün ozal «Turkmenportalyň» okyjylaryna «Joker 2» filminiň surata düşürilip başlanjakdygy baradaky täzeligi ýetiripdik. Bu gün bolsa tanymal aýdymçy Leýdi Gaganyň «Joker 2» filminde surata düşmegi bilen bagly habarlara ünsi çekmek isledik.

Ýadyňyzda bolsa, Hoakin Finiksiň baş keşbi janlandyran «Joker» filminiň birinjisi 2019-njy ýylda ekrana çykdy. Režissiýor Todd Fillipsden şeýle üstünlikli filme garaşanlar az bolsa gerek. Sebäbi ol şol wagtda çenli şeýle çynlakaý çemeleşilen filmi surata düşürmändi.

Film häzirki kino dünýäsinde örän ujypsyz görünýän býujet bilen, ýagny 55 million dollara düşürilip, onuň kassa ýygymy bolsa, 1,075 milliard dollara ýetipdi. Filmde söweş sahnalary we aýratyn effektler ýok diýen ýaly. Emma oňa derek güýçli depressiw atmosfera we Finiksiň ajaýyp çykyşy bar. Film kinomuşdaklary bilen birlikde, «Oskaryň» hem ünsünden düşmedi. 11 ugur boýunça bu baýraga dalaş eden «Joker» iki heýkel gazandy: «Iň gowy saz» we, elbetde, «Iň gowy aktýor» ugurlary.

***

Indi Leýdi Gaganyň bu filme goşulmagy bilen bagly habarlara ünsümizi gönükdireliň! Hawa, Leýdi Gaganyň kino dünýäsindäki ilkinji ädimleri şowly bolmandy. Ol ilkinji synanyşygynda iň ýaramaz ýerine ýetiriliş üçin berilýän «Altyn malina» baýragyny aldy. Şeýle-de bolsa, estrada aýdymçysy «Amerikan elhençlikleriniň taryhy» diýen köp bölümli filmindäki Grafinýa Ýelizawetanyň keşbi üçin «Altyn globusa» mynasyp bolupdy.

Biz aýdymçynyň kino dünýäsindäki üstünligini Bredli Kuper bilen esasy keşpleri janlandyran «Ýyldyzyň dünýä inmegi» filmi bilenem ýatlap bileris. 2018-nji ýylyň 5-nji oktýabrynda tanyşdyrlyşy bolan filmde Leýdi Gaganyň ýerine ýetirýän aýdymlarynyň şirinden ajaýypdygyny islendik adam hem aýdyp biler. Ýeri gelende bellesek, filmde ýerine ýetiren «Shallow» aýdymy üçin Leýdi Gaga «Iň gowy aýdym» ugry boýunça «Oskar» baýragyny-da alypdy. Ýogsa, aýdymçy «Ýyldyzyň dünýä inmegi» filminde iň gowy aktrisa ugrundan «Oskara» dalaşgär görkezilipdi. Şu ýyl aýdymçy «Gucci House» filminde Patrisiýa Režaniniň keşbinde oýnap, ýene-de «Altyn globus» baýragyny aldy.

Indi «Joker 2» we Leýdi Gaga barada: bu filimde Leýdi Gaganyň ýerine ýetirmeginde aýdymyň bolmagyna garaşylýar. Oňa baş gahrymanyň goşulmagy bolsa tomaşaçylar üçin üýtgeşik sowgat bolar. Leýdi Gaga filmde meşhur hudožnik Boss Logic tarapyndan döredilen Harli Kuinniň keşbini janlandyrar.

«Jokeriň» birinji bölümi taryhda iň köp girdeji gazanan filmleriň biridir. Ilkinji gezek ýaş bilen çäklendirilen lenta bir milliard dollardan gowrak girdeji gazandy. Bu bolsa onuň ikinji bölümini düşürmäge iteren ilkinji sebäpleriň biridir. Elbetde, indi filmiň ikinji bölüminiň üstünligine Leýdi Gaga hem öz goşandyny goşmaly bolar.

***

Leýdi Gaganyň aktýorlyk tejribesine ajaýyp diýip bolmaz, ýöne hemişe diýen ýaly onuň janlandyrýan keşpleri ýatda galyjy bolup çykýar. Ol, esasan-da, ýaramaz gahrymanlaryň keşbini gowy ýerine ýetirýär. Grafinýa Ýelizawet «Amerikan elhençlikleriniň taryhy» diýen köp bölümli filminiň esasy gahrymany bolupdy. «Jokerdäki» Harli Kuinn hem köp babatda Grafinýa Ýelizaweta meňzeş gahryman. Şonuň üçin bu filmdäki Leýdi Gaga bizi ýene ekrana baglar diýip umyt edip bileris.

«Joker 2»-niň goýberiljek senesi heniz mälim edilmedi, ýöne surata düşüriliş işleri 2023-nji ýylda başlar. Filmiň senariýasy Skott Silwer tarapyndan ýazylýar. Ol birinji filmde-de Todd Fillips bilen bile işläpdi. Indi bize — kino muşdaklaryna Skott Silwer bilen Fillipsiň döretjek başdangeçirmelerine garaşaýmak galýar. Şeýle hem, Leýdi Gaganyň şirin aýdymlaryna...

«Turkmenportal»