Britan kino akademiýasynyň baýraklary bolan BAFTA-nyň ýeňijileri mälim edildi. Oskar baýraklarynyň buşlukçysy hasaplanýan BAFTA-da iň gowy film diýlip, 1-nji Jahan urşy ýyllarynda bolup geçen wakany gürrüň berýän “1917” atly kino saýlandy. Filmi surata düşüren oskarly Sem Mendes iň gowy režissýor baýragyna mynasyp boldy. “Joker” filmindäki keşbi üçin Hoakin Finiks iň gowy aktýor, “Judi” filmindäki keşbi üçinem Rene Zelwegger iň gowy aktrisa baýraklaryna laýyk görüldi. Ikinji plandaky iň gowy aktýor we aktrisa baýraklary, degişlilikde Bred Pitt (“Bir wagtlar Golliwudda) bilen Laura Derne (“Öýleniş hekaýasy”) gowşuryldy.
Iňlis dilinde bolmadyk iň gowy kino baýragy koreýaly režissýor Bon Žun-honuň surata düşüren “Mugthorlar” (Parasite) filmine berildi. Iň gowy animasiýa diýlip, “Klaus” atly multfilm saýlandy.
Dabarada iň köp baýragy 1917 atly kino alyp, 11 ugurdan dalaşgär görkezilen film şolaryň 7-sinde BAFTA heýkeljiklerini eýelemegi başardy. BAFTA baýraklary 73-nji gezek gowşuryldy.
