Bangladeşiň futbol boýunça milli ýygyndysy mart aýynda Maldiwleriň we Mongoliýanyň ýygyndylary bilen ýoldaşlyk duşuşyklaryny geçirer ― diýip, The Daily Star ýazýar.

Ilkinji duşuşyk 24-nji martda Maldiwleriň, ikinjisi 29-njy martda Mongoliýanyň ýygyndysy bilen bolar. Duşuşyklaryň ilkinjisini Maldiwlerde geçirjek bangladeşli futbolçylar Mongoliýanyň ýygyndysyny öz ýurdunda ― Silhet şäherinde kabul eder.

Bangladeşiň futbol ýygyndysynyň Aziýanyň kubogy ― 2023-iň saýlama tapgyrynda Türkmenistanyň ýygyndysy bilen «E» toparçada ýaryşjakdygyny ýatladýarys.

Ýeri gelende aýtsak, Bangladeşiň ýygyndysy FIFA-nyň reýtinginde 186-njy orny eýeleýär. Milli ýygynda şu ýylyň başyndan ispaniýaly hünärmen Hawýer Kabrera tälim berip başlady.