Merkezi Aziýanyň sebitleýin ekologiýa merkeziniň (MASEM) Türkmenistandaky taslama edarasy suw serişdelerini toplumlaýyn dolandyrmak, daşky gurşawy goramak, howanyň üýtgemegi we durnukly ösüş ugurlary boýunça hünärmenleri taýýarlamak babatda Gazagystanyň Almaty şäherindäki Gazak-Nemes uniwersiteti (DKU) bilen hyzmatdaşlygyny dowam etdirýär.

Hyzmatdaşlygyň çäklerinde 2024-nji ýylda Gazak-Nemes uniwersitetiniň Suw serişdelerini toplumlaýyn dolandyrmak fakultetine Türkmenistandan Nurberdi Ataýew we Menli Ataýewa okuwa kabul edildi. Olar okuwlaryny üstünlikli tamamlap, magistrlik işlerini goradylar we magistr akademiki derejesine mynasyp boldular.

MASEM-iň Türkmenistandaky taslama edarasy yzly-yzyna üçünji ýyl Gazak-Nemes uniwersitetiniň magistraturasyna girmäge dalaşgärlik edýän türkmen raýatlaryna maglumat, maslahat we guramaçylyk goldawyny berýär. Bu işler ýaşlaryň akademiki işjeňligini giňeltmäge hem-de ekologiýa we tebigy serişdelerden rejeli peýdalanmak ugurlarynda ýokary derejeli hünärmenleri taýýarlamaga gönükdirilendir.

MASEM-iň Türkmenistandaky taslama edarasynyň direktory Mergen Kepbanow adam maýasyny ösdürmegiň durnukly geljege goýulýan möhüm maýa goýumdygyny belledi. Şeýle hem ol uçurymlaryň alan bilimleriniň we başarnyklarynyň Türkmenistanyň hem-de sebitiň durnukly ösüşine mynasyp goşant goşjakdygyna ynam bildirdi.

MASEM-iň Türkmenistandaky taslama edarasy hyzmatdaşlyk üçin Gazak-Nemes uniwersitetiniň ýolbaşçylaryna we professor-mugallymlar düzümine hoşallyk bildirip, Merkezi Aziýanyň durnukly ösüşi üçin hünärli işgärleri taýýarlamak maksady bilen sebitiň bilim edaralary bilen hyzmatdaşlygy mundan beýläk-de giňeltmek isleýändigini aýtdy.