Garyşyk başa-baş söweş sungaty (MMA) boýunça türkmen türgeni, PFL guramasynyň ýarym agyr agram derejesindäki dünýä reýtinginde ikinji orny eýeleýän Döwletjan Ýagşymyradow 31-nji iýulda ABŞ-nyň Nýu-Ýork ştatynyň Long-Aýlend sebitindäki UBS Arena sport toplumynda geçiriljek PFL NY ýaryşyna gatnaşar. Onuň garşydaşy reýtingde bäşinji orny eýeleýän, «Smooth» lakamy bilen tanalýan iňlis söweşijisi Simeon Pauell bolar.

Bu duşuşyk Ýagşymyradowyň häzirki möwsümdäki işjeň çykyşlarynyň dowamyna öwrüler. Ol soňky gezek 2026-njy ýylyň 16-njy aprelinde Demirgazyk Irlandiýanyň paýtagty Belfast şäherindäki SSE Arena sport toplumynda geçirilen PFL Belfast ýaryşynda awstraliýaly Taýson Pedrony eminleriň biragyzdan çykaran çözgüdi bilen ýeňdi. Eminleriň üçüsiniň hem hasap kartlarynda netijä 29:28 hasaby bilen türkmen türgeniniň peýdasyna karar berildi. Tutluşygyň üçünji raundynda Pedro güýçli urgular bilen Ýagşymyradowy kyn ýagdaýa salyp, duşuşygy möhletinden öň tamamlamaga golaý geldi. Şeýle-de bolsa, türkmen söweşijisi özüni çalt dürsemegi başardy we garşydaşyny partere geçirdi, jemleýji jaň çalynýança Ýagşymyradow artykmaçlygyny saklap galdy.

Bu ýeňiş Ýagşymyradowa PFL-däki görkezijisini 4 ýeňşe we 1 ýeňlişe ýetirmäge hem-de öz agram derejesindäki öňdebaryjy orunlaryny saklap galmaga mümkinçilik berdi.

Mundan ozal, 2024-nji ýylyň noýabrynda türkmen türgeni ýarym agyr agram derejesinde PFL çempiony adyny gazanypdy. Ol amerikaly Impa Kasanganaýy ilkinji raundyň bary-ýogy 58-nji sekundynda nokaut edip, ýeňipdi.