Aşgabatda 4000 orunlyk köpugurly medeni merkez gurlar, Türkmenistanly dalaşgärler giriş synaglaryna taýýarlanýarlar, Türkmenistan BMG Baş Assambleýasynyň 78-nji sessiýasynda möhüm başlangyçlary öňe sürer we beýleki habarlar

Türkmenistan

1. Geljek üç ýylyň dowamynda Aşgabatda 4000 orunlyk köpugurly medeni merkez peýda bolar. Türkmenistanyň Prezidenti Serdar Berdimuhamedow onuň gurluşygy baradaky Karara gol çekdi. Durmuş maksatly desganyň buýrujysy hökmünde paýtagtyň häkimligi çykyş edýär, potratçy bolsa «Döwlet Gurluşyk» hojalyk jemgyýetidir. Resminamada desgany ýanaşyk ýerlerini abadanlaşdyrmak bilen, 2026-njy ýylyň iýun aýynda ulanmaga doly taýýar edip tabşyrmak bellenilýär.

2. Türkmenistanda ýurduň ýokary we orta hünär okuw mekdeplerine kabul ediş möwsümi dowam edýär. 17 – 30-njy iýul aralygynda dalaşgärler öz saýlan ýokary okuw hem-de hünärment mekdeplerine resminamalaryny tabşyrdylar. 2-nji awgustda giriş synaglaryny tabşyrmak tapgyry başlanar.

3. Türkmenistan Birleşen Milletler Guramasynyň Baş Assambleýasynyň 2023-nji ýylyň 12-nji sentýabrynda Nýu-Ýork şäherinde öz işine başlajak nobatdaky 78-nji sessiýasynda birnäçe möhüm başlangyçlary öňe sürer. Şu ýyl türkmen tarapy Ählumumy howpsuzlyk strategiýasyny işläp düzmek bilen bagly başlangyjy öňe sürmegi göz öňünde tutýar. Türkmenistanyň ýene bir teklibi BMG-niň Terrorçylyga garşy göreşmek müdirligi bilen bilelikde Merkezi Aziýa üçin Terrorçylyga garşy göreşmek maksatnamasyny döretmäge degişlidir. Mundan başga-da, BMG-niň howandarlygynda 2030-njy ýyla çenli parnik gazlarynyň zyňyndylaryny azaltmak boýunça ählumumy Strategiýany işläp düzmek we beýlekiler teklip ediler.

4. Türkmenistanyň «Daýhanbank» döwlet täjirçilik banky talyplara bilim almak üçin amatly karz – «Talyp karzyny» hödürleýär. Bu karz ýokary we orta hünär okuw mekdeplerinde tölegli esasda bilim alýan talyp ýaşlary goldamak, olaryň döredijilik başlangyçlaryny höweslendirmek, hünärlerini kämilleşdirmek babatda amatly mümkinçilikleri döretmek üçin niýetlenendir. «Talyp karzy» ýokary we orta hünär okuw mekdeplerinde okuwyň bahasyny tölemek üçin nagt däl görnüşde berilýär. Karzyň mukdary 42 müň manada çenli ýetip biler. Ýyllyk göterim derejesi 5%. Karzy üzmegiň möhleti üç ýyl. «Talyp karzyndan» peýdalanmak üçin ýüztutmalary we degişli resminamalary bankyň resmi www.dayhanbank.gov.tm internet sahypasyna ibermek zerurdyr.

5. Arkadag şäheriniň Kärizek etrabynyň Aba Annaýew şäherçesiniň saýlanan Geňeş agzalaryna şäherçe saýlaw topary tarapyndan şahsyýetnama gowşurmak dabarasy boldy.

Dünýäde

6. 2023-nji ýylyň 1-nji awgustyndan başlap, daşary ýurt raýatlary Russiýa gitmek üçin bitewi elektron wizasyny alyp bilerler. Bitewi elektron wizasyny almak üçin Russiýanyň DIM-niň ýöriteleşdirilen saýtyna ýüz tutmalary ibermeli. Ýüz tutmanyň ýanyna sanly surat we pasportyň skaner edilen nusgasyny goşmaly. Bitewi elektron wizasy Russiýa bir gezeklik girmäge we ýurtda wizanyň hereket edýän 60 günlük möhletinden 16 gün bolmaga hukuk berýär. Bitewi elektron wizasy bilen Russiýa syýahatçylyk, myhmançylyk we iş sapary bilen gelmek mümkindir.

7. Astananyň häkimligi paýtagtdaky ähli asylan ýazgylary (wyweskalary) ýeke-täk stile getirmek kararyny kabul etdi. Bu üýtgeşmeler Gazagystanyň Prezidenti Kasym-Žomart Tokaýewiň köçe mahabatlarynyň ýerleşdirilmegine gözegçiligi güýçlendirmek baradaky görkezmeleriniň ýerine ýetirilişiniň çäginde amala aşyrylýar. Täze düzgünlere görä, ýazgylaryň reňki binanyň fasadynyň reňkine laýyk bolmaly we göze dürtülmeli däl. Şeýle hem mahabat şekilleri we ýazgylary ýerleşdirilende simmetriýa laýyk gelmegi hem-de reňk sazlaşygynyň sada bolmagy möhümdir.

Sport habarlary

8. Täjigistanyň Futbol federasiýasynyň metbugat gullugy türkmen hüjümçisi Süleýman Muhadowyň Duşenbe şäheriniň «SSKA» toparyndan Bişkek şäheriniň «Dordoý» toparyna geçýändigini habar berdi. «Dordoý» häzirki wagtda Gyrgyz Premýer-ligasy-2023-de 14 oýunda 23 utuk toplap, 6-njy orunda barýar. KPL-iň lideri düzüminde türkmen goragçysy Teýmur Çaryýew çykyş edýän «Abdyş-Ata» toparydyr.

9. Ýokary liganyň möwsüminiň täzeden başlamagyna we Türkmenistanyň Kubogynyň ýarymfinalyna taýýarlyk görýän «Arkadag» toparynyň futbolçylary Bolgariýadaky türgenleşik ýygnanyşygynyň çäklerinde Demirgazyk Makedoniýanyň «Besa» topary bilen dostluk duşuşygyny geçirdi. «Arkadagyň» ilkinji halkara dostluk duşuşygy deňme-deň tamamlandy – 1:1. Türkmen toparynyň düzüminde Ýokary liganyň birinji aýlawynyň iň köp pökgi geçiren oýunçysy Didar Durdyýew tapawutlanmagy başardy.

10. Türkmen türgenleri Çenduda geçirilýän 31-nji Bütindünýä tomusky Uniwersiada gatnaşýarlar. Bu Olimpiýa oýunlary bilen deňeşdirip boljak talyplaryň arasyndaky iň uly bäsleşikdir. Uniwersiada 120 ýurtdan 5000-den gowrak talyp gatnaşyp, sportuň 18 görnüşi boýunça özara bäsleşýärler. Türkmen türgenleri sportuň dzýudo, ýeňil atletika, suwda ýüzmek we uşu görnüşleri boýunça dört ugurda çykyş edýärler. Türkmenistan eýýäm dördünji gezek Bütindünýä talyp oýunlaryna öz wekillerini iberýär. Ýurt 2012-nji ýyldan bäri Halkara uniwersitet sporty federasiýasynyň agzasy bolup, ýaşlaryň arasynda sporty ösdürmek üçin uly tagallalary edýär.