Türkmenistanda

1. Türkmenistanda Özbegistan Respublikasynyň Konstitusion kanunynyň taslamasy boýunça 30-njy aprelde geçiriljek sala salşykda ses bermek üçin üç sany saýlaw uçastogy açylar. Uçastoklar Aşgabatda, Daşoguzda we Türkmenabatda dörediler.

2. Ýewropanyň dikeldiş we ösüş bany «Zenanlar işewürlikde» atly maksatnamanyň çäklerinde zenan telekeçileri mentorlyk mekdebine çagyrýar. Maksatnama 2-nji maýda başlanýar. Gatnaşyjylary seçip almak işleri bäsleşik esasynda geçiriler. Maksatnama gatnaşmak mugt amala aşyrylýar.

3. 8-nji aprelde Moskwanyň Domodedowo howa menzili her ýylda guralýan «Ählumumy diktant» atly bilim berijilik çäresiniň geçirilýän meýdançasy bolar. Ony «Roskosmos-yň» kosmonawtlar toparynyň serkerdesi, Russiýa Federasiýasynyň we Türkmenistanyň Gahrymany Oleg Kononenko okar.

4. Hindistanyň Türkmenistandaky ilçihanasy Aşgabat şäheriniň ýaşaýjylaryny «Bagtyýarlyk» sport toplumynda ýerleşýän Ýoga we adaty lukmançylyk merkezinde geçirilýän ýoga sapaklaryna çagyrýar. Ýogany gündelik durmuşynyň bir bölegine öwürmek isleýän her bir adam sapaklara ýazylyp biler.

5. Türkmenistanyň Döwlet medeniýet merkeziniň Mukamlar köşgünde türkmen estrada aýdymçylarynyň gala konserti uly üstünlik bilen geçirildi. Agşamyň maksatnamasy dünýä meşhur film sazlaryny öz içine aldy. Türkmenistanyň halk artisti Atageldi Garýagdyýew Muslim Magomaýewiň repertuaryndan «Melodiýa» we «Gök bakylyk» («Синяя вечность») aýdymlaryny ýerine ýetirdi, Türkmenistanyň at gazanan artisti Ahmet Atajanow meşhur hindi aýdymlary bilen çykyş etdi. Konserte Haýdar Eminowyň ýolbaşçylygyndaky «Owaz» orkestriniň sazandalary we Türkmenistanyň Döwlet hory hem gatnaşdy.

Dünýäde

6. Serbiýada hem-de Bosniýa we Gersegowinada soňky 150 ýyldaky iň güýçli ýaz gary ýagdy. Garyň ýagmagy sebäpli şäherlerde ulag dyknyşyklar emele geldi, daglarda bolsa ýollar gar bilen örtüldi. Jemagat hyzmatlary gullugy gije-gündiziň dowamynda işleýär, howpuň «gyzyl» derejesi yglan edildi. Jemgyýetçilik ulaglary hiç hili hereket etmeýärler, taksi sürüjileri bolsa ýollaryň heniz gardan arassalanmadyk ýerlerine sargyt almakdan ýüz öwürýärler.

7. «HBO» kompaniýasy «Tagt oýunlary» serialynyň indiki prikwelini surata düşürmek işleriniň ýakyn wagtda başlanjakdygyny habar berdi. Geljekki filmiň sýužeti Eýgon I Targariýeniň Westerosy basyp almagynyň taryhyna bagyşlanýar. Wakalaryň dowamlylygy esasy kyssanyň başlamagyndan, takmynan, 300 ýyl öň. «HBO» häzirki wagtda ssenarist gözleýär. Westerosyň basylyp alynmagy baradaky prikwel film hökmünde surata düşüriler, soň bolsa teleserial görnüşinde dowam eder. «Tagt oýunlarynyň» öňki prikweli bolan «Aždarhanyň öýi» 2022-nji ýylyň tomsunyň ahyrynda ýaýlyma berlipdi.

Sport habarlary

8. Russiýanyň milli ýygyndysynyň düzüminde üç gezek dünýä çempiony bolan «Ak Bars» hokkeý klubynyň hüjümçisi Danis Zaripow «Ak Barsyň» ýaşlar toparynyň 11 oýunçysyndan we tälimçilerden ybarat giňişleýin wekiliýetiniň çäginde Aşgabada geldi. Türkmenistanyň Hokkeý federasiýasynyň habar bermegine görä, Kazan toparynyň wekilleri GAR-da geçiriljek dünýä çempionatynyň oýunlaryna Türkmenistanyň milli ýygyndysynyň oýunçylaryny taýýarlamak üçin Aşgabada geldiler. Türgenleşik işlerine tejribeli tälimçi Artýom Anisimow ýolbaşçylyk eder, derwezebanlaryň, goragçylaryň we hüjümçileriň tälimçileri hem oňa ýardam ederler. Mundan başga-da, ady rowaýata öwrülen Danis Zaripow Türkmenistanyň milli ýygyndysynyň hokkeýçileri bilen öz tejribesini paýlaşýar.

9. FIFA Peruny 2023-nji ýylda ýaşlaryň arasynda futbol boýunça dünýä çempionatyny geçirmek hukugyndan mahrum etdi. «Bu karar kabul edýän ýurduň ýaryşy geçirmek üçin zerur infrastrukturany döretmek baradaky borçnamalaryny ýerine ýetirip bilmezligi sebäpli kabul edildi» diýlip, FIFA-nyň beýanatynda bellenilýär. Çempionat Peruda 2023-nji ýylyň 10-njy noýabryndan 2-nji dekabry aralygynda geçirilmelidi. Ýaryşyň täze guramaçysy soň yglan ediler. Ýaryşyň geçiriljek senesi häzirlikçe üýtgewsiz galýar.