1. Bäşimowa Mähri Hojamgulyýewna Türkmenistanyň daşary işler ministriniň orunbasary wezipesine bellenildi. Şu gün Türkmenistanyň Prezidenti Serdar Berdimuhamedow degişli Karara gol çekdi.

2. 10-njy fewralda Aşgabatdaky Mukamlar köşgünde meşhur Brodweý sazlaryndan eserler boýunça konsert geçiriler. Konsert amerikan artistleri we pedagoglary Keýt Bassyň we Aaron Ýangyň türkmen paýtagtyna 10 günlük saparynyň çäklerinde ABŞ-niň Aşgabatdaky ilçihanasy we Türkmenistanyň Medeniýet ministrligi tarapyndan bilelikde gurnalar.

3. 26-27-nji aprelde Dubaýda Türkmenistanyň energetika pudagyna daşary ýurt maýa goýumlaryny çekmek üçin Halkara roud-şou dabarasy geçiriler. Bu çärä öňdebaryjy milli we halkara energetika kompaniýalary, şeýle hem diňe bir Türkmenistanda däl, eýsem, tutuş sebitde nebitgaz pudagynyň geljegini kesgitlejek hünärmenler gatnaşarlar.

4. Hytaýyň Milli nebitgaz korporasiýasynyň Türkmenistandaky şahamçasy «Bagtyýarlyk» ylalaşylan zolagynda geologiki gözlegleri geçirmegi meýilleşdirýär.

5. 2023-nji ýylyň başyndan bäri «Rosselhoznadzor» Moskwa sebitine Türkmenistandan getirilen 5 müň tonna ter pomidoryň karantin fitosanitar gözegçiligini amala aşyrdy. Häzirki wagtda Türkmenistan Russiýany pomidor bilen esasy üpjün ediji bolup durýar we her ýyl türkmen kärhanalary bu ugurda eksporty artdyrýarlar.

6. Lebap welaýatynyň Çärjew etrabynyň Farap şäher kitaphanasynda beýik türkmen şahyry we akyldary Magtymguly Pyragynyň doglan gününiň 300 ýyllygyna bagyşlanan kitap sergisi açyldy. Kitap sergisi bilen ilkinji bolup Farap şäherinde ýerleşýän orta mekdepleriň türkmen dili we edebiýaty mugallymlary hem-de ýokary synp mekdep okuwçylary tanyşdylar.

Dünýäde

7. «Uzbekistan Airways» döwlet awiakompaniýasy tomusky uçuş tertipnamasynda Daşkentden Milana we Pariže howa gatnawlaryny dikelder. Iki ugur boýunça uçuşlar sişenbe we anna günleri amala aşyrylar. Daşkentden Milana ilkinji uçuş 2023-nji ýylyň 28-nji martynda, Pariže bolsa – 31-nji martda amala aşyrylar.

8. Maýkl Jeksonyň durmuşy barada biografik film surata düşüriler. Filmde baş keşbi onuň ýegeni Jafar Jekson janlandyrar. «Maýkl» diýlip atlandyrylan täze film «Lionsgate» studiýasynda surata düşüriler. Jafar Maýklyň doganlarynyň biri we Jeksonlaryň «The Jackson 5» atly maşgala ansamblynyň agzasy Jermeýn Jeksonyň ogludyr.

Sport habarlary

9. Iň soňky gezek «Ahal» toparynda çykyş eden türkmen hüjümçisi Süleýman Muhadow oýun karýerasyna täzeden başlap biler. Muhadow erkin agent hökmünde Täjigistanyň çempionatynyň «Hujand» topary bilen şertnama baglaşyp biler. Süleýman Muhadow – «Olimp» sport mekdebini tamamlan, ozal meşhurlyk gazanan türkmen hüjümçisi Çaryýar Muhadowyň ogly. Muhadow 2014-nji ýylda Aşgabadyň «HTTU» toparynyň düzüminde AFK-nyň Prezidentiniň kubogyna eýe boldy, ýaryşyň iň gymmat oýunçysy we iň köp gol salan oýunçysy diýlip ykrar edildi.

10. Futbolçy Serdar Azmun «Baýeriň» düzüminden çykyp biler. «Sky Sport Italy-nyň» italýan habarçysy Fabrisio Romanonyň bellemegine görä, Fransiýanyň «Olimpik Marsel» topary hüjümçini satyn almak barada gepleşiklere başlady. «Marsel» hüjümi güýçlendirmek üçin diňe iki-üç oýunçyny göz öňünde tutýar.

11. Angliýanyň «Çelsi» topary Portugaliýanyň «Benfika» toparynyň ýarymgoragçysy Enso Fernandesi satyn aldy. 2022-nji ýyldaky dünýä çempionatynyň iň gowy ýaş oýunçysynyň transferi üçin Londonyň topary APL üçin rekord bolan 121 million ýewro töledi. Bu möwsümde 22 ýaşly argentinaly Portugaliýanyň çempionatynda 17 duşuşyga çykdy we bir pökgi geçirip, 5 gol pasyny berdi.